Coronamut akiuussuserneqarsimanermut uppernarsaatit atuutilingajalersut

Akiuussutissamik kapitissimanermut uppernarsaateqartalernissaq sulissutigineqartoq, danskit peqqissutsimut utoqqarnullu ministereqarfiata DR-imut ilisimatitsissutigaa. Uppernarsaat taanna 2021-ip aallartisimatsiarnerani piareerneqassaaq.

Akiuussutissamik kapitissimasut kapitissimanermut uppernarsaammik tunineqartassapput. Taanna angalanermi iluaqutissatut atorneqarsinnaavoq.

- Akiuussutissamik kapitissimanermut uppernarsaammik nunanit allanut angalanermi peqarnissaq piumasaqaataalersinnaanissaa naatsorsuuutigineqarpoq. Danskit kapitissimanermut uppernarsaateqarnissaq atorfissaqartippaat, danskit peqqinnissamut utoqqarnullu ministereqarfiat DR-imut allappoq.

Kapitissimanermut uppernarsaateqalertussanngornera, Dansk Industrimi angallassinermut pisortap, Michael Svanep, nuannaarutigaa.

AAMMA ATUARUK Naalakkersuisut corona allaanerusoq pissutigalugu nunatsinnukarnissamut inerteqquteqarneq sivitsorpaat

Imaasinnaavoq uppernarsaat taanna angallannermut nunat killeqarfiinik matusinernit angallannermilu killilersuinernit, marsip qaammataanili atuutilersunit, eqqugaasimaqisumut iluaqutaasoq.

- Nunanut allanut isernissamut akiuussutissamik kapitissimanermik tunillanneqarsimannginnermulluunniit uppernarsaateqarnissaq piumasaqaatavoq. Akiuussutissamillu kapitissimanermut uppernarsaatip tamanna uppernarsarsinnaavaa, Michael Svane oqarpoq.

Danskit sulisitsisuisa, tassa Dansk Erhvervip, tamanna aamma nuannaarutigaa. Tassani pisortaanerup, Brian Mikkelsenip, akiuussutissamik kapitissimanermut uppernarsaateqalernissaa nutaarsiassatsialaanerarpaa.

Akiuussutissamik kapitissimanermut uppernarsaateqalernissaq sivisuumik oqallisaareerpoq. Kikkut kapitissimanersut taamaattoqalernikkut nakkutigineqarsinnaalissallutillu covid-19 siaruatsaalineqarsinnaassangatinneqarpoq.