Najaaaraq Ittummut ilaasoq: Inuttat sungiussisimanngitsutut pissusilersorput

Vittus Lorentzen, Qeqertarsuarmeersoq, Najaaraq Ittummut ilaavoq, taannalu ima oqarpoq:

- Tupannartorujussuuvoq, ilaasullu iluamik kalerrinneqarpiaratik. Uivilaartupilussuupput,  taamatullu pisoqarnerani isorisinnaasara tassaavoq ilaasut inuttanit najorneqanngimmata, ilaasullu qanoq iliornissaannik siunnersuisoqarani, Qeqertarsuarmiu Vittus Lorentzen oqarpoq.

Najaaraq Ittuk Qeqertarsuarmiit Aasiannukartilluni ippassaq ualikkut nalunaaqutaq marluk qaangilaaraa Kitsissuarsuit eqqaanni ikkarlimmat taanna ilaavoq.
Najaaraq Ittummut aquttoq kingorna aalajangerpoq Kitsissuarsunnut talikkiartorniarluni, umiarsuaq qanoq ajoqusertigisimanersoq paasiniarneqarniassammat.

Najaraaq Ittuk ilaasoqarluni ingerlaqqissanngitsoq taava aalajangerneqarpoq. Disko Line-ip umiarsuaataa alla Aasianniit aallaqqammersoq taartaajartussasoq kingorna aalajangerneqarpoq.

Ilaasut Aasiannut ingerlaqqinnginnerminni akunnerup aappaata qeqqa Kitsissuarsunni utaqqipput, pisullu naatsumik ima oqaaseqarfigai:

- Iliornerat isornalaartupilussuuvoq, aamma sungiussisimarpalunngitsorujussuupput, Vittus Lorentzen oqarpoq.

Disko Line-ip teknikeqarnermut pisortaa Peter Sørensen pisumut annertunerusumik oqaaseqarsinnaanngikkallarnerarpoq, Najaaraq Ittummik aquttup pisortatigoortumik nassuiaataa takoqqaarusukkamiuk:
- Ilaasulli ilaasa naammaginanngitsumik pissusilersorfigineqarsimasutut misigisimappata ajuusaarutigaara, tamanna miserratigissanngilara, Peter Sørensen oqarpoq.

Taamatut ajutoortoqarsimagaangat suliassap ingerlanneqartarneranut periutsit aalajangersimasut malinneqartarput ISM-imik taaneqartarttut, taakkualu matumani malinneqarsimapput, suliarlu suli ingerlammat Peter Sørensen oqaaseqarumanngikkallarpoq.

- Tupannarpoq, annertunerusumillu pisoqanngimmat qujanaqaaq, kisianni isornartupilussuuvoq, Vittus Lorentzen Qeqertarsuarmeersoq oqarpoq.