Naja Petersen Ilaqutariinnermut Peqqissutsimullu naalakkersuisunngussaaq

Atassutip siulittaasua Finn Karlsen tusagassiuutinut taama nalunaaruteqaqqammerpoq.
Allattoq Mads Lynge
novembarip 06-at 2008 15:28

- Atassut sinnerlugu nuannaarutigalugu nalunaarutigissavara Atassut sinnerlugu Aasiaat kommuniani kommunalbestyrelsimut ilaasortaq aammalu Qaasuitsup kommunissaani ikaarsaariarnermut ataatsimiitialiami ilaasortaq, isumaginninnermut siunnersorti Naja Petersen, 40-nik ukiulik, Ilaqutariinnermut Peqqissutsimullu naalakkersuisunngussammat, Finn Karlsen allappoq.

Naja Petersen isumaginninnermut siunnersortitut ilinniarsimasuuvoq mannalu tikillugu Aasiaat kommuniani siunnersortitut meeqqat inuusuttuaqqat ilaqutariillu sullillugit.

Naja Petersenip Ilaqutariinnermut Peqqissutsimullu naalakkersuisutut sulinermini qinigaaffimminit aammalu ulluinnarni suliffimminit sulinngiffeqarallassaaq.

Naja Petersen Ilulissani inunngorpoq 1968-imi, uinilu Knud Erik Kristensen pingasunik qitornaqarput, mannalu tikillugu Aasianni najugaqarlutik.