Naja Paulsen isumaqarpoq qanittukkut qinersisoqassasoq
Partiip Siumup aamma Naalakkersuisoqatigiit ajornartorsiulernerminni sumut killinnersut, Nunatsinni politikkimik malinnaalluartumut, Naja Paulsen-imut nalilertipparput.
- Siumup iluani pissutsit ilungersunartutut oqaatigisariaqarput, pissutillu peqqissaarullugit aaqqinniarneqanngippata tamanna qinersinermik kinguneqariaannaavoq.
Naja Paulsenip eqqoriarpaa, Siumup iluani pissutsit aaqqinneqanngippata upernariartornerani qinersisoqariaannaasoq.
Aalisarnermut Naalakkersuisuusimasup, Karl Lyberthip immikkut siunnersortissamisut, Tom Ostermann-imik atorfinitsitsinera kukkunerujussuusoq, Naja Paulsenip oqaatigaa aamma oqaatigalugu, Tom Ostermann-ip aappaata, Naalakkersuisut siulittaasuata, Aleqa Hammondip atorfinitsitsineq ilisimasimassagaa. Naja Paulsen nangilluni ima oqarpoq.
- Tupinnarpoq Tom Ostermann-imik atorfinitsitsigaluarneq Aalisarnermut Naalakkersuisuusimasup, Karl Lyberthip kisimiilluni akisussaaffigalugu oqaatigimmagu. Naalakkersuisut siulittaasoqarput aqutsisuminnik. Aleqa Hammond-illu arajutsisimasinnaanngilaa Tom Ostermannip Naalakkersuisut ilaannut atorfinitsinniarneqarnera, taamaattumik Aleqa Hammond-ip takusinnaasimasariaqaraluarpaa tamanna ajornartorsiummik pilersitsissasoq.
Naja Paulsen taama oqareerluni aamma oqarpoq, Tom Ostermannip atorfinitsinneqarnera kikkunnit tamanit isornartorsiorneqalermat, Aleqa Hammond imminut annaanniarluni Karl Lyberthip Aalisarnermut Naalakkersuisuuneranit tunuarniuteqaqqusimagaa.
Taamaattumik Aleqa Hammondip akisussaassuseqarluni sassarternissaa, Naja Paulsenip maqaasivaa.
- Isumaqarpunga kukkuneq taama annertutigisoq, Aleqa Hammondip nammineerluni akisussaassuseq tigusariaqaraluaraa.
Naja Paulsen-illi ilimaginngilaa, Aleqa Hammond-ip akisussaassusermik takutitsilluni kukkuneq tamanna imminut tutsissimasinnaagaa.
- Tassami kuikkuneq arlaatigut qanoq kinguneqartussaq, Aleqa Hammondip takusinnaasimasariaqaraluarpaa taannalu aallaavigalugu qanoq iliuuseqarluni, Naja Paulsen naliliivoq.
Karl Lybethip taartaata, Finn Karlsenip Naalakkersuisoqarfik iluamik ingerlateriassallugu misilittussanngorpaa. Finn Karlsenillu Naalakkersuisunngornerani, Siumumi pissutsit ilugersunartut aaqqinneqarsinnaanersut Naja Paulsenip ilimaginngilaa.
- Finn Karlsen Naalakkersuisunngoraluarpalluunniit apeqqutaalluinnarpoq Siumup iluani pissutsit aaqqinneqarsinnaanersut, tamanna qularaara.
Nunatsinni politikkimik malinnaalluartoq, Naja Paulsen taama naggasiivoq.
