Naggueqatitta qanga inuusaliaat saqqummersinneqalerput
Periutsit assigiinngitsut atorlugit ileqqutoqqanik ingerlatitseqqiisarneq inuusaliani takuneqarsinnaavoq.
Naggueqatigiit Inuit eqqillillu assilillugit inuusaliat 50-it Yukonimi eqqumiitsulianut saqqummersitsivimmi maanna saqqummersinneqarput. Saqqummersitsineq taaguuteqarpoq "Ileqqutoqqagut mersortarpagut", taannalu Vancouverimi ukioq kingulleq OL-qarneranut atatillugu iluatsilluartumik takutinneqaqqaarpoq.
Kinguaariit ingerlaneranni arnat aanaakkullu panimminnik ernuttaminnillu ilinniartitsinerminni ammit inuusaliat atortarsimavaat.
Inuusaliat atisaliallu, taakkuupput arnanit mersorneqartartut. Nunap inoqqaavi eqqillillu arnat 30-t, Nunavummeersut, Inutsialunneersut kiisalu Yukonimeersut inuusalianik mersortarput. Inuusaliat kulturimi assiliaaqqatut isigineqarput.
Eqqumiitsulianut saqqummersitsiviup Yukon-miittup nalunaarutigaa, inuusaliat atorlugit eqqumiitsulioriaaseq maanna kingumut utersaaqqilersoq, inuusallu issittumi, avannarpasissumilu inooriaatsinik tarrarsuisuusut, arnanit mersorneqartartut.
Arnarpassuupput eqqumiitsulioriaatsimik taamaattumik aallartitseqqissimasut, inuusallu mersornermi periutsinik assigiinngitsunik takutitsinermuinnaq atorneqarneq ajorput, aammali taamani inooriaatsimut ilisimasaqarnerulernissamut atorneqartarlutik. Inuusat 20 cm-imiit 40 cm-rimut angissuseqartarput ilaatigullu kameeqqanik kusanarnerpaanik amaatinillu sapangaaqqanik pinnersaatitalinnik peqarlutik.
Saqqummersitsineq issittumi ilisimatusarfittut ilisimaneqarluartumi, Tuluit Nunaanni Scott Polar Institutemi aggustip tungaanut takuniarneqarsinnaavoq. Mersortartut nunap inoqqaavi Nunavummeersut arlaqartut mersoriaatsitik takutinniarlugit saqqummersitsinermi peqataapput. Tamatuma kingorna saqqummersitsineq, Inuit kulturiata tupinnarluinnartup takutinneqanissaa siunertaralugu europami nunanut allanut ingerlaartinneqassaaq.
