Naggueqatitta natsiit aarlerinartorsiunnginnerarpaat
Amerikami imartamik silaannartamillu nakkutilliisoqarfik NOAA issannguaq nalunaaruteqarpoq, natsiit USA-mi uumasunut nungutaanissamut aarlerinartorsiortunut inatsimmut, ESA-mik taaneqartartumut ilanngunneqassasut. Taamatut siunnersuuteqarnermi immap sikuata siunissami milliartuinnarnissaanik missingiussinermik tunngaveqarpoq, tamatumalu piniartunut qanoq sunniuteqarnissaa ataatsimilluunniit eqqaaneqarani.
Mary Simon allappoq, Amerikamiut taama siunnersuuteqarnerannut, uumasunik illersuiniaqatigiit aningaasassaaleqinngitsut tunuliaqutaasimassasut, tamatumalu kinguneranik naggueqatigiit Inuit uumasut piniakkatik inooriaasertillu illersorlugit iliuuseqaqqittariaqalissasut.
Mary Simon aamma oqarpoq, nannut nungutaanissamut aarlerinartorsiortutut nalunaarsorneqarnissaat USA-mit akuerineqarsimasoq, tamannali Canadami naggueqatigiit Inuit piniartuisa akerlilersimagaat. Taamaattorli natsernut tunngatillugu siunnersuut suli paasiuminaanneruvoq, tassami piniartunit oqaatigineqartut kisitsisillu pisortanit pigineqartut naapertorlugit natserpassuaqartoq oqaatigineqarmat. Kisitsisit pisortanit pigineqartut ersersippaat, natsiit millioninik arlalinnik amerlassuseqartut - tassa nungutaaqqajaanngilluinnartut.
Uumasunik nungutaanissamut aarlerinartorsiortoqarpat, tamanna naggueqatigiinnit Inunnit siulliulluni maluginiarneqassaaq, Mary Simon oqarpoq erseqqissarlugulu natsiit nungataaqqajaanerannik oqalunneq tunngavissaqanngitsoq.
Mary Simon naggataatigut oqarpoq, Amerikamiut siunnersuutaat oqaloqatigiissutigiumallugu Canadami aalisarnermut ministerimut saaffiginnereerluni, ingammillu siunnersuutit taamaattut Canadami naggueqatigiinnut sunniutigisartagaat oqaloqatigiissutigiumaneqartut.
