Naggueqatigiit Inuit isornartoqartitsipput

Inuit Tapiriit Kanatami Canadap nunataata avannarpasinnerusortaa pillugu Canadami naalakkersuisut iliuusissatut suliaat isummerfigaat.

Imarisaa pillugu nuannaarutigaat Inuilli toqqaannarnerusumik sunniuteqartinneqarnissaat kissaatigalugu. Inuit Tapiriit Kanatami præsidentiata Mary Simonip Canadami naalakkersuisut eqqortuliornerarpai silaannaap allanngoriartornera pillugu Canadap issittortaa pingaarutilittut isigilermassuk, tassami aqqutissat nutaat pisuussutillu periarfisaqarnerulersitsipput nunallu inuii sunniuteqarneruleriartorlutik.

Iliuusissami tunngaviit sisamaasut avatangiisinik nakkutiginninnerunissamik ilaatigut imaqartut ajunngitsuunerarpai tunngaviilli tallimaannik pingaarutilimmillu amingaateqarnerarlugit Canadamimi Inuit naligisatut iliuusissami isigineqartariaqarmata. Tassami Inuit issittup kitaaniit kangimut Nunavumi, Nunavimmi Nunatsiavumilu qangaaniit maannamut nunaqarlutillu piginnaatitaaffeqarput ataqqineqartariaqartunik, Inuit Tapiriit Kanatameersut oqarput.

Iliuusissaq Inuit ajornartorsiutaannik aaqqiinissamut tapertaasussaavoq Inuillu ilinniartitaanikkut, aningaasarsiornerup ineriartortinneqarneratigut inissaqarniarnikkullu periarfissaqarnerulersittussaavai taamaalilluni nunaqarfiit inuiaqatigiillu nukittunerusut pilersinneqaleriartortussaallutik, taakkumi iliuusissap piviusunngortinneqarneranut peqataasussaammata. Inuit tapertaanerisigut iliuusissaq aatsaat piviusunngortinneqarsinnaavoq taamaammallu Inunnut erseqqissumik attuumassuteqartinneqartussaalluni. Canadami naalakkersuisut issittoq pillugu sulineranni tamarmi Inuit qitiutillugit attuumassuteqartinneqartussaapput, Mary Simon oqarpoq.

Marianne Stenbækip Canadami Montrealimeersup ilanngutaa Aqqalu Olsvigimit kalaallisuunngortinneqarluni atuarneqarpoq.