Naggueqatigiit Inuit ilaarusupput
Canadami naggueqatigiit Inuit kattuffiat, nuna tamakkerlugu innuttaasut isumaannik misissuisitsisimavoq, matumani Canadamiut naggueqatigiinnut Inunnut issittumullu qanoq isumaqarnerani paaserusunneqarluni.
Misissuinermi paasisat nikalluallarnartoqaqaat, tassami Canadami innuttaasut nalinginnaasumik, naggueqatigiinnik Inunnik ilisimasaqarpiarneq ajortut paasineqarmat. Assersuutigalugu issittumi najugaqarnerup akisunerujussua, aperineqartut 70 procentiisa sinneqartut naluaat. Aamma aperineqartut ilarpassuisa, naggueqatigiit Inuit indianerillu assigiinngissuteqarnersut nalusarpaat, amerlanersaasali silap pissusaata allanngoriartornera issittumut sunniuteqaqisoq ilisimavaat.
- Tamanna naammaginanngilaq, Mary Simon kattuffimmi Inuit Tapiriit Kanatami siulittaasuusoq oqarpoq, uagut naggueqatigiit Inuit peqataarusuppugut. Canadami naggueqatigiit Inuit, Canadamiunut allanut naleqqiullutik ukiunik 15-inik inuunikkerunissaat naatsorsuutigineqarmat akuersaarneqarsinnaanngilaq. Aamma Canadamiut naggueqatigiinnik Inunnik taama ilisimasakitsiginerat akuersaarneqarsinnaanngilaq, Mary Simon oqarpoq.
Taamaattumik 2010 tassaassanerarpaa pisortatigoortumik naggueqatigiit Inuit ukiuat, ukioq naggueqatigiinnut Inunnut pigitinneqarlunilu sammitinneqartoq.
- Ukiuunerani OL-eqarnissaa Inussummik ilisarnaaserneqarmat ajunngilaq, kisianni naggueqatigiit Inuit tassaaginnanngillat ilisarnaatitut atorneqartussat. Naggueqatigiit Inuit Canadamiut allat assigalugit peqataarusupput, Mary Simon naggasiivoq.
Naggueqatigiit Inuit pillugit kiisalu peqataarusunnerat ersersinniarlugu, 2010-p ingerlanerani Canadamiunut assigiinngitsunik aaqqissuussisoqartassasoq, Canadami ilanngutassiortorput Mary Simon nalunaarummini ilaatigut allappoq.
