Naggueqatigiit Inuit eqqaaneqanngillat

Qineqqusaarnermut atatillugu oqallinnerit annertuut TV-kkut sapaatip-akunnerani uani aallakaatinneqarnerat Canadami naggueqatigiit Inuit Kattuffianit, Inuit Tapiriit Kanadamit, nuannaarutigineqarpoq. Kisianni Issittoq tamaanilu ajornartorsiutit annerit sunnguamilluunniit taaneqannginnerat Inuit Tapiriit Kanatami præsidentip, Mary Simonip, paasisinnaanngilaa.

- Naggueqatigiit Inuit, unammillernartullu ukiuni aggersuni taakku atugassaat, partiit siulittaasuinit sisamanit sumilluunniit eqqaaneqanngillat, Mary Simon oqarpoq, aamma oqarluni, indianerit, taakkulu inigisamikkut atugarliornerujussuat, partiit siulittaasuata ataasiinnaap naatsuarannguamik eqqaagaa.

Partiilli siulittaasuisa nunap inuii pillugit eqqaanngisaat Canadami aviisit annersaata, Globe and Mailip, sapaatip-akunnerata uuma ingerlanerani allaaserisaqattaarpaa.

Pinngitsooratik taasassat marluugaluarput; Siullermik: ilaqutariit pingasut/sisamat illumi ilaqutariinnut ataatsinut naatsorsuussami nutaanngeqisumi isugutaqisumilu najugaqartarput, taamaammat peqqissutsimikkut inuuniarnermikkullu arlalippassuartigut ajornartorsiuteqartarlutik.

Aviisimi aamma allaaserineqarpoq, partiit sisamat sammisinnaasaasa annertuut aapparigaluaraat ilinniartitaaneq, partiilli siulittaasuisa tamanna oqaaseqarfiginngivippaat. Tamanna mamianartuliaavoq qaqugorsuarmut kingunerlutsitsisussaq - indianerimmi  naggueqatigiillu Inuit 60 procentiinit amerlanerit meeqqat atuarfiat naammassineq ajorpaat. Tamatuma kingunerisinnaavaa ilinniaqqissinnaannginnerat, suliffissarsituarunillu akilernerlutarujussuarmik suliffittaartarput.

Aviisi Globe and Mail allappoq, ajornartorsiutit tamakku  eqqaaneqannginnerat, aaqqiissutissanillu siunnersuuteqannginnerat  partiinut nikanarsaataasoq.