Naasut pillugit atuagaq nutaaq saqqummersinneqartoq
Atuagaq "Kalaallit Nunaata naasui – timimut tarnimullu" naasulerituunit marlunnit Lissi Olsenimit toqoreersumillu Kirsten Jespersenimit atuakkiaavoq.
Taakkumi isumaqarsimapput nunatsinni naasut nerisassiornermi tiiliornermillu atussallugit pitsaaginnaratik aamma napparsimanermi nipaallisaatitut nappaatinullu pinaveersaatitut atorneqarsinnaalluartut.
Naasut immikkut toqqakkat 25-t atuakkami nutaami sammineqarput, taakkulu amerlanersaat iluaqutissartaqarlutik, naqiterisitsisartoq Lene Therkildsen Milik Publishingimeersoq saqqummersitsineq pillugu tusagassiorfinnut nalunaarummi taama allappoq.
Atuagaq marlunnik immikkoortortaqarpoq, siullermilu nammineerluni naasunik qanoq katersisoqarsinnaanera assit atorlugit takutinneqarluni. Immikkoortup aappaa naasut tiimut, nerisassanut iffiukkanut allanullu atornissaannut malitassanik imaqarpoq.
Atuagaq kalaallisut danskisullu saqqummersinneqarpoq. Aamma tuluttuunngorlugu saqqummersinneqarnissaa siunertaavoq.
Saqqummersitsineq Nuummi Inuk Hostelsimi sisamanngornermi ualikkut nal. 16-18 malunnartinneqassaaq, atuakkamilu malitassat atorlugit kaagilianik tiilianillu ussigassaqassaaq.
