Naartusut kalaallisut nittartagartaalerput

Naartusunut ilaannut kiserliortutut misiginarsinnaasarpoq angajoqqaanngorlaanullu  mikisuutitaarneq artornarsinnaasarluni. Naartusunut angajoqqaanngorlaanulluunniit paasissutissanik siunnersuutinillu kalaallisut aallerfiusinnaasumik nittartagaqanngilaq.

Tamanna juumuup, psykoterapeutip lifecoachillu Esther Hammekenip iliuuseqarfiginiarpaa.

Nittartakkamik naartusunut angajoqqaanngorlaanullu saaffigineqarsinnaasumik nittartagaliulerpoq.

Nittartakkami nuna tamakkerlugu naartusut angajoqqaanngorlaalluunniit imminnut saaffigisinnaanngussapput, misilittakkatillu naapertorlugit imminnut ikiorlutik siunnersoqatigiiffissaqalissallutik.

Esther Hammekenip naartusut angajoqqaanngorlaallu nittartakkatigut sakkussanik naartunerlu pillugu paasissutissanik tuniorarneqarsinnaassasut, paasissutissiinikkullu naartunerup ingerlanerani angajoqqaanngorlaajulluniluunniit ajornartorsiutaasinnaasut pinaveersaartinneqarsinnaassasut neriuutigaa.

- Naartunermi qaammatit pingasut siulliit juumuuliannginnermi naartusumut sivisusinnaasarput. Naartusoq nalornissutigisaqarsinnaasarpoq. Nittartagaq nuna tamakkerlugu atuisunut paasissutissanik aallersinnaaffinngussaaq atuisullu akornanni ilisimasanik misilittakkanillu immersoqatigiiffiussalluni, Esther Hammeken oqarpoq. Nittartagarlu tipisiulaariarlugu, nittartakkatigut nammineq atuisullu akornanni naartuneq pillugu apeqqutinut tunngatillugu attaveqaqatigiittarnissaq periarfissanngorsinnaassasoq ilimagaa.

Esther Hammekenillu naartusut kiserliorsinnaasarnerat aamma eqqaavaa, ingammik naartusut naartunerminni sulisinnaanngitsut imaluunniit inuusuttunnguit naartusut.

-  Naartuneq naartusunut initoqaaq sulisinnaanngitsunullu kiserliorfiusinnaasarluni, ingammik ilaquttat qanigisallu tamarmik sulisartillugit. Naartusut kiserliornerat annikillisarniarlugu nittartakkatigut imminnut attaveqaqatigiinnissaminnut ikioqatigiinnissaminullu periarfissinneqassapput, Esther Hammeken oqarpoq.

Esther Hammekenip nittartagaq aggustip ingerlanerani saqqummiunneqassasoq naatsorsuutigaa, neriupporlu nittartagaq iluaqutigalugu naartuneq naartusullu misigisinnaasaat isiginiarnerulerneqassasut maluginiarnerulerneqassasullu.

Nittartagaq kalaallisut qallunaatullu qupperneqassaaq.