Naartuersinneq 10.000 koruuneqartarpoq
Taama peqqinnissaqarnermut Naalakkersuisoq Doris Jakobsen, Demokraatineersup Randi Vestergaard Evaldsenip apeqqutaanut akissuteqarpoq. Ukiuni tallimani kingullerni naartuersinnerit 4059-it isumagineqarsimapput, piffisamilu tassani meerartaartut 4191-llutik. Tassa ukiuni tallimani kingullerni naartuersittartut inunngortutulli amerlatigiinnangajapput. 2013-mi naartuersinnerit inunngortuniik 55-inik amerlanerusimapput . Tassani naartuersittut 875-iusut inunngortut 820-ullutik.
Aamma atuaruk Doris: sumiginnaasarneq akiortigu
Naartuersinnermi ataatsimi agguaqatigiisillugu 6000 koruuneqarpoq. Tassungalu aamma ilanngunneqassalutik angalanermi aningaasartuutit agguaqatigiisillugulu 4000 koruunimik naleqartarlutik.
Nunaqarfimmi najugaqaraanni naartuersinniarnermi illoqarfimmut naartuersinniarneq pisariaqartarpoq. Qaanaami najugaqaraanni Ilulissanut naartuersikkiartussaaq, tassanilu billetsi siumut utimullu 13.000 koruuni missaani akeqarpoq.
Naartuersittarneq politiikerinit tusagassiorfinniillu ukiuni kingullerni eqqartorneqartaqaaq.
Aamma atuaruk VIDEO Naartuersittarnermut oqallinneq allamorujussuaq sangusoq
Ukiut 15-it kingulliit naartuersittartut amerlassusaat nikinneqanngilaq. Akissummi peqqinnissaqarnermut Naalakkersuisoq pinaveersaartitsinerit assigiingitsut eqqartorpaai, ilaatigut siusissukkut iliuuseqarneq, naartunaveersaatit p-pillet usuup puuilu akeqangitsut, pissusilersuutigisartakkanik allannguinissamut suliniutit soorlu inuusaq atorlugu suliniut, atoqatigiinnermut tunngasunik ilinniartitsineq allallu. Suliniutit ukiuni kingullerni naartuersittarnerup amerlassusaanut allanngortitsisimanngitsut.
Aamma atuaruk Atassutip inuusuttai: Naartuersinnerit akeqalerlik
Randi Vestergaard Evaldsenip aamma apeqqutigaa nunap immikkoortuisa ilaanni Naalakkersuisut isumaat naapertorlugu suliniutinik allaartitsisoqarnissaa immikkut pisariaqartinneqarnersoq. Akissummilu Doris Jakobsen allappoq kissaatigisaminik naartulersartut amerlassusaat naalakkersuisut ikilisikkusukkaat, tamannali sivisuumik suliassaasoq oqaatigalugu, pissusilersuutinimmi allannguinermik aamma ilinniarfiit kiisalu allat suleqatigiilluarnissaanik imaqartussaasoq oqaatigalugu. Immikkulli pisariaqartitsisoqarnersoq allatamini eqqaangilaa.