Naammagittaalliutit ikiliartorput
KNI logistik-imik, tassa piareersaanermik aqutsivimmillu aamma umiarsuartigut assartugassat aallarunneqannginneranni nioqqutissanik nakkutilliivimmik pilersitsinerup kingorna iluatsittoqarpoq. Immikkoortortaqarfiup taassuma Nunatsinni quersuarni pingaarnerni aamma qitiusumik ingerlatsivimmi 30-t sulisorai, Aalborgimilu usilersuisarfimmi nakkutilliisoqalerluni. Tassanngaanniimmi nioqqutissat Nunatsinnut nassiussat ukiut tamaasa 20.000 tonsiusartut nakkutigineqartarmata. - Tamatuma assigaa nioqqutissat innuttaasumut ataatsimut 350 kiilut nassiunneqartarnerat, KNI logistikimi pisortaq Lars Steen Pedersen oqarpoq.
Aalborgimit nassiussanik nakkutiginninnerulerneq naammagittaalliuutit ikileriarnerannut taassuma pissutaanerarpaa.
taamaalilluni Pilersuisumi niuertup pisiniarfiulluunniit pisortaata nioqqutissat pisiniarfimminut bestiilikkani, ajunngitsumik nassiunneqarnersut aatsaat sapaatit akunneri sisamat qaangiunnerisigut misissortarunnaarpai. Nioqqutissat inniminnerneqartut usilersuunneqartinnagit maanna misissorneqartalerput aamma niuertup pisiniarfiulluunniit pisortaata inniminniinernut allannguutaasut taamaalilluni ilisimasinnaanngorai, Lars Steen Pedersen erseqqissaavoq.
Nassiussanik nakkutilliillualernerup kinguneranik timmisartukkut nassiunneqartartut ukiumut 150 tonsit inulaarlugit ikileriarsimapput.
- Timmisartukkut nassiussat pilertortumik tiguneqarsinnaasarput, akisunerungaatsiarlutilli. Taamaattumik nassiunneqartut usilersuinermut atatillugu misissorneqartalernerisigut nassiussisunit kukkussutaasinnaasut ikileriartinneqarsinnaasimasut, KNI logostikimi pisortaq oqarpoq.
