Naammagittaalliorsinnaanermut piffissaq sivitsorpoq
Atuisartut Siunnersuisoqatigiivisa ilisimatitsissutigaat, nioqqutissanik pisinermi naammagittaalliuteqarsinnaaneq/utertitsisinnaanermullu pisinnaatitaaffik ukiunut marlunnut sivitsorneqassasoq, novembarip ulluisa aallaqqaataanni kingusinnerusukkulluunniit pisiat eqqarsaatigalugit.
Nioqqutissamik suugaluarnersumik pisinermut atatillugu naammagittaalliuteqarsinnaaneq, maannamut ukioq ataaseq atuussimasoq, ukiunut marlunnut atuuttussanngorlugu sivitsorneqarpoq.
Tamatuma saniatigut taamaassangatitsinermut malittarisassaq, qaammatinik arfinilinnik sivisusseqartoq, aamma atuutilissaaq. Tamanna ima paasineqassaaq, nioqqutissap pisiarineqartup amigaateqarnera kukkuneqarneraluunniit pisinermiit qaammatit arfinillit qaangiutsinnagit paasineqassagaluarpat, taava naatsorsuutigineqasssaq nioqqutissap tunniunneqarnerani amigaataasoq aamma pioreersimassasoq.
Aallaaviusoq taava imaalerpoq, nioqqutissap amigaateqaratarsinnaanera pillugu niuertoq ukiuni marlunni akisussaassasoq. Tamatuma kingorna akisussaaffik pisisumut aatsaat atuutilissaaq.
Nioqqutissap pisiarineqarnerata kingorna qaammatit marluk iluanni ajoqut/amigaat paasineqarpat, piffissaagallartillugu naammagittaaliornertut isigineqassaaq, soorunalimi naammagittaaliorsinnaanermut/utertitsisinnaanermut piffissarititaasup ukiunik marlunnik sivisusseqartup iluaniippat.
