Naalungiarsuusiat atuartunut eqqarsalersitsipput
Atuartut ilaat Kulunnguaq Poulsen 16-ninik ukiulik kujataani Eqalugaarsunneersoq eqqarsariaallatsinneqarsimavoq:
- Ajunnginnerpaajutissangaluarpara aatsaat ilinniagaqareerlunga piareersoriguma meerartaaruma.
Naalungiarsuusiamilli paarsineq Kulunnguaq Poulsenimut aallaqqaataani nuannersimagaluarpoq:
- Paarileqqaaratsigu nuanneraluaqaaq. Kisianni ullut appassaani paarinerani qasunarsivoq killeqakatannarsillunilu, Kulunnguaq Poulsen oqarpoq.
Taassuma naalungiarsuusiamik paarsinermini meeraqarluni qanoq killeqartigisoq paasivaa.
18-inik ukiulik, Ludvig Kleemann, Upernavimminngaanneersoq, naalungiarsuusiamik paarsinermini meeqqap qiasarnerani imminut piffissaqarfiginera killeqalersimavoq:
- Meeqqat paariniaraanni unnukkut qasunalaartarpoq. Qiviarpaluleraangammi ornittariaqartarpoq. Imminut piffissaqarfiginanngilaq killeqarnartorujuullunilu. Tassa qasunarigaanni meerajaartaannginnissaq eqqarsaatigineqarsinnaavoq, Ludvig Kleemann oqarpoq.
Villads Villadsenip Efterskolia 79-inik Nunatsinnit tamaneersunik atuartoqarpoq. Taamaattumik misiliinerup Nunatsinnut tamarmut siammarsinnaanissaa pisortap tulliata Lise Handrupip qularinngilaa, naalungiarsuusamillu ulluni marlunni paarsisitsineq iluatsilluarsimanerarpaa:
- Nunatsinnit tamaneersunik ilinniartoqaratta, tassa Ittoqqortoormiuniit, Tasiilamiit, kujataaniit ilami sineriak tamakkerlugu Qaanaaq angullugu. Taamaattumik misiliineq Nunatta sinneranut siaruarluarsinnaavoq. Ilinniarluarfigisimaqaarput nuannaarutigeqalugulu, neriuutigaarpullu misileqqissinnaassallutigu, Lise Handrup oqarpoq.