Nunanit allanit

Naalungiarsuit allat paarlaanneqarsimasinnaanerat aarleqqutigigaat

Canadami indianerit meeraat inunngorneranni napparsimmaviit ilaanni Norway House-imi paarlaassisoqaqqissimanersoq maanna apeqqutigineqalerpoq.

Allattoq Marianne Stenbæk, Montreal, Canada

septembarip 01-at 2016 06:51

Nutserisoq Mads Lynge

Angutimmi indianerit marluk napparsimmavimmi tassani inunngornerminni paarlaanneqartoorsimasut sapaatip-akunnerata siuliani paasineqarpoq. Napparsimmavik taanna Canadap immikkoortuani Manitobamiippoq.

Peqqinnissaqarfimmi pissutsit Canadami nunap inoqqaavinit assigiinngitsunit kingorna apeqquserneqarput, nunap inoqqaavisa sullinneqarnerat apeqquserneqarluni.

Cree-indianerit Norway House-imi 1970-ikkunni inunngorsimasut inunngornerminni paarlaanneqarsimasut paasinarsimmat Canadami nunap inoqqaavisa akornanni aalassassimaartoqarpoq.

Aamma atuaruk Naalungiarsuit paarlaanneqartut: Ukiut 41-t qaangiummata aatsaat paasigaat

Høvding Ron Evans Norway House-imut apeqqusiisunut ilaavoq, nunap inoqqaavi sinnerlugit ernumalluni. Kukkusoqarneratigut taamaalisoqarpa, imaluunniit nunap inoqqaavi pineqarmata kukkusoqarpa? Ron Evans aviisimut National Postimut aperivoq.

Nunap inoqqaavisa akornanni inuup sananeqaataanut ilisarnaatitut takussutissat maanna misissorneqartussanngorput, tassa DNA-vat misissorneqassalluni, Norway House-imi 1970-ikkunni inunngorsimasut DNA-vat misissorneqassallutik.