Naalungiarsuit paarlaanneqartut: Ukiut 41-t qaangiummata aatsaat paasigaat
Canadami peqqinnissaqarfimmi mianersuaattoqartarnera nunap inoqqaavinit isornartorsiorneqakkajuttarpoq.
Isornartorsiunerlu sapaatit-akunnerata siuliani annertuseriaannarpoq, indianerimmi creet David Taitip aamma Leon Swansonip DNA-visa misissuiffigineqarnerisigut taakku inunngornerminni paarlaanneqarsimanerat ilaqutariinnilu allani peroriartorsimanerat paasineqarmat.
Taakku Manitobami napparsimmaveeqqami Norway Housemi 1975-imi inunngorput. Napparsimmaveeraq nunap ilaani Creet reservatiisa marluusut atugaraat.
Angutit pineqartut reservatimi ataatsimi peroriartorput ilaqutariillu aappaannut assingutinneqartarsimallutik. Taamaammat DNA-minnik misissuiffigitinniarlutik aalajangersimapput. Misissortinnerisalu takutippaat napparsimmavimmi paarlaanneqarsimasut taamaalillutillu ilaqutariinni allani peroriartorsimasut.
Ukiaq assingusumik aamma pisoqarpoq. Indianerit meerartaat marluk napparsimmavimmi tassanerpiaq Canadami naalakkersuisunit ingerlanneqartumi aamma paarlaanneqarput.
Canadap peqqissutsimut ministeriata Jane Philpottip tusagassiorfinnut oqaatigaa, pisut marluusut ilungersunarluinnartut Canadamilu nunap inoqqaavinut peqqinnissaqarfimmik pitsaanerusumik pilersitsisoqarnissaata qanoq pingaaruteqartigineranik takutitsisut.