Naalagaaffeqatigiinnerup oqaluttuassartaa pillugu nangeqattaartuliaq nutaaq
Nunatta, Savalimmiut Danmarkillu sutigut ataqatigiippiarnerat nangeqattaartuliami arfinilinnik immikkoortortalimmi Danmarkip Radioata sammissavaa.
"Danmark issittumi pissaanilissuanngorusuppoq, Kalaallit Nunaatali Savalimmiullu Danmark ukiuni 300-ni peqqusaarfigiuarpaat - taamaaliortuassallutillu," tv-kkut piviusulersaarummik suliarinnittut aviisimi Politikenimi ullumi saqqummersumi ilaatigut taama allaatigisaqarput.
Savalimmiut, Kalaallit Nunaata Danmarkillu naapinnerat pisariitsuunngisaannarsimavoq, piviusulersaarusiortut marluusut, Martin Breum aamma Jakob Gottschau, isumaqarput.
Iluatsissimasunik oqaluttuarpassuit pingaarnertut samminagit assigiinngissutaasut kipiuitsumik isumaqatigiinniartarnermik kalaallillu savalimmiormiullu namminiilivinnissaminnik piumasaqariartuinnarnerannik pilersitsisimanerat misissorsimavaat.
Nangeqattaartuliap "Naalagaaffeqatigiinnerup oqaluttuassartaa"-ta immikkoortua siulleq Danmarkimi nalunaaqutaq malillugu unnugu 21.30 aallakaatinneqassaaq, kalaallisuunngortinneqarneralu KNR-ikkut upernaaru aallakaatinneqarumaarluni.
Nangeqattaartuliap immikkoortui arfiniliusut aamma Nunatsinni meeqqat atuarfiini ilinniarnertuunngorniarfinnilu atuartitsinermi atorneqarsinnaasunngorlugit suliarineqarsimapput.