Naalakkeruisooqatigiit: Upernaakkut ataatsimiinneq ulapiffiusoq
- Upernaakkut ataatsimiinnerni peqataaffiginikuusanni una artornarnerpaat ilaanniippoq, Demokraatit politikkikkut oqaaseqartartuat Justus Hansen oqarpoq.
Upernaakkut ataatsimiinnermi immikkoortut nunamut pingaartitsinermut tunngasut amerlavallaartut, Justus Hansen isumaqarpoq.
- Nunanit allaneersut nunaqavissut suliffiinik arsaarinnittut, oqaatsillu, ilaatigut tuluit oqaasii tapertarisamik oqaatsini siullinngortinneqarnissaat, sammineqartorujussuupput, Justus Hansen oqarpoq.
Taassuma telekkut sullissinermik ammanerulersitsinissaq sulissutigaa. Tamannali maanna piviusunngolerunanngilaq.
Aamma atuaruk Telekkut sullissinermik ammanerulersitsinissaq amerlanerussuteqartut itigartikkaat
Upernaakkut ataatsimiinneq ulapiffiusimasoq Siumumit aamma isumaqartoqarpoq. Ataatsimiinnerli ajunngitsumik ingerlasimasoq, Siumumi politikkikkut oqaaseqartartup, Jens-Erik Kirkegaardip oqaatigaa
Siumut: angusaqarfiulluartoq
- Ataatsimut isigalugu, angusaqarfiulluartutut isigaarput, Jens-Erik Kirkegaard oqarpoq, nangillunilu.
- Inarluutillit oqaaseqartartuattut uanga nammineerlunga iluarisimaarpara, kisianni aamma sinaakkutit, assersuutigalugu aatsitassarsiornermut radioaktiviusunik akulinnut naammassipput, taakkulu arnertuumik alloriarfittut isigaakka, Jens-Erik Kirkegaad oqarpoq.
Aamma atuaruk Uranimik avammut nioqquteqarnissaq akuersissutigineqartoq
Inatsisartut sulinissaannut sinaakkusissoq
Atassut upernaakkut ataatsimiinnermut aamma iluarisimaarinnippoq.
Steen Lyngellu Inatsisartut ataatsimiinnerisa naammassilernerani oqaluuserineqartoq pingaartutut immikkut ersersikkusuppaa.
- Aningaasaqarnermut nalunaarusiaq, ippassaq eqqartugarput immikkut taasariaqarpoq. Tassa unammilligassagut tassani eqqartorneqarput, kisianni aamma qanoq iliuuseqarnissamut naalakkersuisut ilaatigut siunnersuutinik nalunaarusiami tunniussaqarput, isumaqarpungalu taakkua Inatsisartut sulinissaannut sinaakkusiisut, Atassut sinnerlugu Inatsisartunut ilaasortaq Steen Lynge taama oqarpoq.
Aamma atuaruk Randi: Innuttaasunut ikiorsiissutit ikilineqassapput