Naalakkersuisuulersut sanaartorneq ataavartoq qulakkeerumagaat
Naalakkersuisooqatigiilersut Nunatsinni ukioq naallugu sanaartortoqarnissaa qulakkeerniarlugu anguniagaqarlutik ippassaq atsioqatigiipput.
Tamanna anguniarlugu ilaatigut Nunaqarfinni illussanik sanaartornissamut aningaasaliisoqassasoq isumaqatigiissummi allassimavoq.
Naalakkersuisooqatigiilersut ilaatigut isumaqatigiissutigaat Nunaqarfinni illoqarfinnilu realkreditit aqqutigalugit illuliornissamut periarfissaqarfiunngitsuni periarfissanik annertusaarusupput. Taamaammat misissorniarpaat realkreditimut assingusunik aningaasaateqarfiliortoqarsinnaanersoq.
Aamma isumaqatigiissummi allaqqavoq 20-20-60 atorlugu taarsigassarsititsisarneq ingerlaannassasoq. Taamatuttaaq ernianut tamakkiisumik ilanngaateqartarneq ingerlaannassasoq.
Suliffeqarfiit mikinerusut sanaartornermi peqataanerunissaat anguniarlugu sanaartugassanik suliariumannittussarsiuussisarneq pillugu inatsit nutarteriffigineqassasoq isumaqatigiissummi allaqqavoq.
Sanaartornermi nakkutilliineq sukaterneqassasoq aamma allassimavoq.
BSU aqqutigalugu illuutillik illuutiminnik iluarsaassinissaannut atatillugu tapiisutigineqartartut nutaamik qummut killissalernissaannut naalakkaersuisuulersut nalilersuissapput.
Nunatsinni inissaaleqineq akiorniarlugu naliginnaasunik attartortakkanik inissialiortitsinissamik isumaqatigiissummi erseqqissumik allassimasoqanngilaq.
