Naalakkersuisut utaqqimaarusupput

Unammileqatigiinnermut nakkutilliisut aalajangiinerat naalakkersuisut utaqqeqqaarusuppaat.

- Taamaallaat oqaatigisinnaavara, Naalakkersuisuniit arlaatigulluunniit akuleruffiginavianngikkipput, attaveqarnermut naalakkersuisoq Jens B. Frederiksen oqarpoq.

Skynet immap naqqatigut kabelimut attavininniarluni Tele Greenlandimut qinnuteqaataa itigartinneqarpoq, inatsisitigut tunngavissaqartinnginnerarlugu.

- Malittarisassaliortoqarnissaa pisariaqarpoq, taamaaliunnginnermilu aningaasat kaaviaarnerat misissorneqaqqaartariarluni, Jens B. Frederiksen oqarpoq.

Illoqarfinni anginermi mikinernilu akileeqatigiinneq qanoq pisarnersoq Piumasarinikuugitsik misissorneqassasoq, Telestyrelsimit Tele Greenlandimillu piumasarineqarsimasoq, Jens B. Frederiksenip oqaatigaa.

- Aningaasat ingerlaarneri massakkut misissorneqarput siunertaralugu malittarisassanut piareersaanissaq. Kisianni imaanngilaq nunarput taama isikkoqartillugu suna tamaat ammaannarsinnaagipput, malittarisassioqqaartariaqassaagulli, Jens B. Frederiksen oqarpoq.

Taava imaappa suli ammaasoqarsimanngitsoq, ukioq kingulleq taama oqartoqareeraluartoq?

- Oqarsinnaavunga 100 procentimik ammaasoqarnikuunngilaq, kisianni alloriarnerit siulliit tiguneqarput Skynet akuerineqarmat, Jens B. Frederiksen naggasiivoq.

Skynetip Ilulissani Sisimiunilu aqquteqanngitsumik internettimik annertuumik nassiussuivimmik tuniniaasinnaalernissani pilersaarutigaa. Suliffeqarfiullu Nuuk tamakkerlugu antenneboksinik ikkussuileruttorpoq. Maannakkumullu nivinngaatitigassat affaat ikkussorneqareerlutik.

Ilisimatitsissutigisinnaavarput Skynetimut aningaasaliisut tassaammata inuit Nunatsinneersut Danmarkimeersullu. Skynetimut amerlanerpaanik aningaasaliisoq tassaavoq suliffeqarfik qarasaasianik tuniniaasoq Comby Nuummeersoq.