Naalakkersuisut takornarianik amerlanerusunik takunissartik qilanaaraat

Inuussutissarsiornermut, suliffeqarnermut niuernermullu naalakkersuisoq, Vittus Qujaukitsoq tusagassiortunik ullaap tungaa qulinut qiteqquttoq ataatsimiisitsivoq, Naalakkersuisullu takornariaqarnermi iliuusissartut pilersaarutaat saqqummiullugu.
Allattoq Sara K. Jakobsen
maajip 19-at 2016 15:49

Saqqummiussinermi sammineqarput: ”Takornariartitsinermik Kalaallit Nunaanni ineriartortitsineq - Suut iliuusaasariaqarpat?” kiisalu ”Nunamut tamarmut takornariartitsinermi pilersaarut 2016-2020”

Takornariartitsinermik Nunatsinni ineriartortitsinissamik iliuuserisassat pingasunut agguataarneqarput.

Siulleq angallassinermi aaqqissuussinerit. Tullia namminersortut aningaasaliisarneri. Pingajuattullu ussassaarisarneq.

Mittarfiit tallineqarnissaat ujartorneqarpoq, saniatigullu anganikkut akitsuutit apparnissaanut ujartuillutik, assersuutigalugu Ilulissani mittarfiup tallineqarneratigut 30%-imik akinik appaasoqarsinnaanera, Naalakkersuisut oqariartuutigaat.

Aamma atuaruk Ilulissani takornarianut pissutsit naleqqutinngitsut

Nunatsinni takornariartartut amerlanerusut tikittalernissaat anguniagaavoq, tassa 2040-mi ukiumut katillugit 131.000-it takornariat tikittalernissaat takorloorneqarluni.

Takornariallu timmisartukkut angallanneqartut 74.000-iussapput, takornariallu umiarsuarnut takornariartaatinut ilaasut 39.000-iussangatinneqarlutik, tamanna suliffissanik nutaanik 330-iusunik pilersitsisinnaanera aamma takorloorneqarpoq.

Naalakkersuisut takornariaqarnermi iliuusissatut pilersaartutaat tamaat uani takujuk

Aammattaaq takornarianut pilerisaarinerit annertusineqassapput, soorlu takornariat, Tysklandimeersut, Tuluit Nunaanneersut, Amerikallu avannaaneersut, Islandimut angalasartut Nunatsinnut aamma tikisittalernissaat anguniarneqarpoq, assersuutigalugu qitiusumik takornariat ornittagaannik pilersitsiortortoqarluni.

Aamma atuaruk Mittarfiit allanngortitsilluinnassapput

Taakkua saniatigut namminersortut aningaasaliisinnaanissaannik, Naalakkersuisut akuersissuteqalerniarput. Tamannalu akuersissutinik pilersitsinermi namminersortut aningaasaliinerisa qularnaaqquserneratigut pissaaq, assersuutigalugu inuilaarsuarni akunnittarfinnik pilersitsinermi, aammalu aalisariarnissanik piniariarnissanillu aaqqissuussinertigut qularnaveeqqusiinikkut. 

2016-imiit 2020-ip tungaanut takornariaqarnerup pitsanngorsarnissaanut Naalakkersuisut 60 millionit koruuninik immikkoortitsipput.