Naalakkersuisut suli uuliasiorusupput
Lars Emil Johansenilli taama oqarnera Naalakkersuisunit tapersersorneqanngilaq. Lars Emil Johansen ima oqarpoq:
- Imaq asattuutissavarput, nunalu aatsitassarsiorfigalugu. Tassa qajassuarnerpaamik iliorfigisinnaasarput. Uanga nammineq isumaga, tassa erseqqissartariaqarpara uanga nammineq inuttut isumagaara immap naqqani uuliasiorneq sapinngisamik tunuarsimaarfigisariaqaripput. Pissutigalugu tassa imaq tassammat ukiorpassuarni inuiaat kalaallit inuuniarnerminnut tunngavigisaat, Inatsisartut siulittaasuat Lars Emil Johansen ippassaq oqarpoq.
Inatsisartut siulittaasuat Lars Emil Johansen, Oqallinnermi ippassaq taama oqarpoq.
Taamatullu oqartoqarnissaa, ICC-p siulittaasuanit Aqqaluk Lyngemit utaqqineqarsimavoq:
- Lars Emil Johansenip immap naqqani uuliasiornermut tunngasoq oqaatigisaa sivisuumik utaqqisimavara. Tassa politikerit arlaata taama oqarnissaa utaqqinikuugakku, qujavungalu Lars Emil Johansenip tamanna oqaatigimmagu, ICC-p siulittaasua Aqqaluk Lynge oqarpoq.
Aalisarnerup immallu pisuussutaanik iluaquteqarnerup Nunatta aningaasarsiorneranut qitiulluinnartutut inissisimanerat eqqarsaatigineqartariaqartoq, Lars Emil Johansenip aamma oqaatigaa:
- Siunissami aamma raajarniassaagut, siunissami aamma qaleralinniassagut, siunissami aamma saattuarniassaagut, siunissami aamma arfanniassaagut, siunissamilu aamma puisinniarsinnaasariaqarpugut. Taamaattumik uanga ima eqqarsartunut ilaavunga: Uuliasiornermut akuersissutit siulliit tunniunneqartut taakkua kinguneqassanngippata, taava immap naqqani uuliasiornissamut akuersissummik tunniusseqqissanerluta eqqarsaatigeqqissaartariaqarparput, Inatsisartut siulittaasuat Oqallinnermut ippassaq oqarpoq.
Lars Emil Johansenilli taama oqarnera Naalakkersuisunit ilalerneqanngilaq. Parteeqataa, Aatsitassaqarnermut Naalakkersuisoq Jens Erik Kirkegaard ima oqarpoq:
- Inuiaqatigiinni isummat assigiinngitsuusinnaaneri nalunngilarput, aamma isummat assigiinngitsut partiit iluanni aamma pilertortarput. Taamaattoq Naalakkersuisuniit sulissutigivarput Nunatsinni pisuussutivut uumasut uumaatsullu nunamiittut imartatsinniittullu uumasut uumaatsullu atorluarnissaat ujartortariaqaripput. Ullutsinni silarsuaq sukkasuumik ineriartortillugu aningaasat assigiinngitsorpassuarninngaanniit isaatitassat pisariaqartippavut. Isaatitsivissaq ataaseq, marlulluunniit toqqissisimananngitsumik inissitsitsisinnaammata, Aatsitassaqarnermut Naalakkersuisoq Jens Erik Kirkegaard oqarpoq.