Naalakkersuisut siulittaasuata ukiortaami oqalugiaataa
- Taamaaliunngikkutta tamanna kinguaariinnut tullernut kinguneqartussaavoq, Naalakkersuisut siulittaasuat oqarpoq.
- Inuiaqatigiinni sanngiitsortavut ikiussavavut. Siusinaartumilli pensionisiaqartut amerlassusaasa appasissumiitinnissaat aamma innuttaaqatitta sapinngisamik amerlanerpaat ikiorsiissutinik pisartagaqarnermit suliffeqarnermut utertinnissaat suliassaavoq imaannaanngitsoq, Aleqa Hammond oqarpoq.
Aatsitassat uraanimik akoqanngilluinnarnissaannik piumasaqaammik atorunnaarsitsineq, Naalakkersuisut siulittaasuata oqalugiaammini aamma eqqaavaa.
- Piumasaqaammik atorunnaarsitsineq aatsitassanik uranitalinnik qalluilernissatsinnik kinguneqassanngilaq, Aleqa Hammond oqarpoq, nangillunilu:
- Atorunnaarsitsinerup kinguneranik uagut Danmarkilu peqatigiilluta uranimik qalluinissamut maleruagassanik suliaqalernissarput kingunerissavaa. Malittarisassat taakku nunarsuarmioqatigiit akornanni avatangiisinut peqqissutsimullu malittarisassanik sakkortunerpaanik naammassinnissapput, Naalakkersuisut siulittaasuat oqarpoq.
Aleqa Hammondip ilanngullugu oqaatigaa, aalisarnermut inatsisip allanngortinneqarnissaanut siunnersuut Inatsisartut ukiormanna upernaakkut ataatsimiinneranni saqqummiunneqartussaasoq. Nunatta Arfanniarneq pillugu ataatsimiititaliarsuarmut, IWC-mut ilaanera nuannaarutigalugu aamma oqaatigaa. Nunat tamat arfanniarneq pillugu ataatsimiititaliarsuata siunissami suli arfattassanik aqutsillunilu, arferit qanoq amerlatigisut siunissami pisarineqartarnissaannik aalajangersaasarnerata ingerlaannartariaqarnera Aleqa Hammondip ippassaq unnukkut oqalugiaammini oqaatigaa.
