Naalakkersuisut siulittaasuata naalakkersuisoqarfia Ombudsmandip misissuiffigilerpaa
Tamannalu pissutigalugu Inatsisartut ombudsmandiata sulianik Naalakkersuisoqarfiup Siulittaasuata Naalakkersuisoqarfiata allagaatinik paasitinneqarnissaq pillugu suliarinninnera pillugu misissuinermik nammineerluni aallartitsiniarluni ullumikkut aalajangerpoq. Taamatut aalajangernera ilaatigut Malling & Hansen Damip eqqartuussissuserisutut arlaannaanulluunniit attuumassuteqanngitsuunngitsumik misissuinerata ombudsmandimit atuarneqarsimaneranik tunngaveqarpoq. Ombudsmandimi sulianik suliarinnermi kukkunernik arlalinnik naammattuugaqarsimavoq.
-Tamanna tunuliaqutaralugu isumaqarpunga sulianik taamaattunik Naalakkersuisut Siulittaasuata Naalakkersuisoqarfiata ataatsimut suliarinnittarneranik misissuiguma eqqornerpaassasoq. Misissuineq imatut ingerlanneqassaaq uanga sulianik arlalinnik qinersissaanga, malittarisassallu pisortatut oqartussaasunut atuuttut naapertorlugit taakkua suliarineqarsimanersut naliliiffiginissaat siunertaralugu misissuillunga, matumani Pisortat ingerlatsinerat pillugu paasitinneqarsinnaatitaaneq pillugu inatsit aamma suliassat suliarineqartarnerat pillugu inatsit ilanngullugit eqqarsaatigalugit, Inatsisartut ombudsmandiat Vera Leth tusagassiorfinnut nalunaaruteqarluni taama allappoq.
Misissuinermi suliat amerlangaatsiartut pineqartussaammata misissuinerup qaqugu inerneqarnissaa ombudsmandip massakkorpiaq paasissutissiissutigisinnaannginnerarpaa.
Inatsisartut Ombudsmandiat aamma eqqartuussissuserisumut misissuititsinerup pineqartup avammut saqqummiunneqarsimanera pillugu apeqqut misissuiffiginiarlugu aalajangersimavoq. Avammut saqqummiussinerup inatsisitigut naapertuuttuunersoq apeqquserneqarsimavoq.
