Naalakkersuisut siulittaasuat partiiminit tapersersorneqarpoq
Naalakkersuisooqatigiit Royal Greenland-imik ikiuniarlutik milliardip affaanik aningaasaliisimanerat paasilluarneqarpoq.
Kuupik Kleist oqarpoq, Nalakkersuinikkut ukiuni tulliuttuni sisamani isumaqatigiissut ataatsimeersuarnermi qitiutillugu sammineqartoq, pingaartumik aalisarnermut, tunisassiorfeqarnermut piniartunullu tunngassut oqallisigineqarlutik.
- Inuit Ataqatigiit ataatsimeersuartuisa tamarmiullutik taperserpaat timitalersornissaalu suleqataaffigerusullugu.
- Aalisarneq inuussutissarsiutitut pingaarnertut ingerlaannassappat inatsisitigut nutarterinissaq pisariaqartinneqarpoq, aammalu sinerissami qanittumi aalisartut illersorneqartariaqarnerat oqaallittoqarpoq. Aammali aalisarnermut inuiaqatigiinnut aningaaatigut pissarsissutaanerunissaa ujartuiffigineqarpoq, soorluttaaq aalisagartassat Naalakkersunit pinnani immikkut pisassiisartunit agguataarneqartalernissaat isummiunneqarpoq. Kiisalu aalisarnerup ukiorpassuarni inuussutissarsiutaanissaa siunertaralugu pisuussutinik illersuinissaq aalajangersaaffigineqarluni, Kuupik Kleist oqarpoq.
Royal Gtreenland ikiorserniarlugu koruunit milliardit affaannik aningaasaliineq Inuit Ataqatigiit ataatsimeersuarnerannut aallartitat aamma taperseraat, siulittaasoq oqarpoq.
- Taamaaliortasriaqarsimaneq ataatsimeersuartunit paasineqarlunilu akuersaarneqarpoq. Nalorninanngilarmi, Inatsisartut aningaasaliisimanngikkaluarpata, suliffissaqarniarnikkut aningaasarsiornikkullu suniuteqapiluttussaagaluarmat, aammalu allatigut kingunerlutsitsisoqarsinaanera pinngitsoortineqarsimammat paasineqarpoq, Inuit Ataqatigiit siulittaasuat Kuupik Kleist oqarpoq.
Inatsisartuni aamma Folketingimi ilaasortaq Juliane Henningsen siulittaasup tulliatut, politikkiik suliaqartussatut qinerneqarpoq, Nanortalimmeersoq Henrik Brummerstedt ataqatigissaarisutut siulittaasup tulliatut qinerneqarluni.
