Naalakkersuisut siulittaasuat nunani allamiunik oqaloqateqarpoq
Ataatsimeersuarneq nunanik allanik soqutigisaqaqatigisanik taaneqarsinnaasunik oqaloqateqarnermut aamma atorneqarpoq. Ilaatigut nunat OLT-mik taaneqartartut EU-mut attaveqarneq pillugu oqaloqatigineqartarput.
- Periarfissaq atorluarlugu nunat allat naalakkersuisuinik oqaloqateqarnermut atorparput. Silap pissusaanut tunngasut isumaqatigiinniutigineqarnerisa saniatigut, nunat uagut soqutigisaqaqatigisavut aamma naalakkersuinikkut attaveqarfigisariaqakkatta sinniisaat naapillattaavavut oqaloqatigisarlugillu. Ilaatigut Nunatta inissisimaneranut tunngasunik nassuiaallugit, aamma soqutigisavut pillugit suleqatigiissinnaanermut tunngasunik oqaloqatigisarlugit.
- Nunat allat aamma OLT-mik aaqqissuussiffigineqartut aamma oqaloqatigisarpavut. Ilaatigut nunat OLT-mut ilaasut, piffissami aggersumi EU-mut attaveqarnerisa nutarteriffigineqarnissaat pillugu 2010-mi ataatsimeeqattaarnerit pisussaammata. Tassami uagut EU-mut pitsaanerpaamik isumaqatigiissuteqarnissaq kissaatigaarput. Matumanilu nunat OLT-mik aaqqissuussinermut ilaasut suleqatigilluarnissaat soqutigisaraarput. Taamaalilluta niueqatigiinnikkut pitsaasumik angusaqarsinnaaniassagatta, tassami ullumikkut Nunatta aalisarnikkut EU-minngaannit piumasaqarfigineqarnera sakkortuvoq, tamakkulu pitsanngorsaavigineqarsinnaanerat uagut soqutigisaraarput, Kuupik Kleist naggasiivoq.
