Naalakkersuisut: Saviminilerinermik Ilinniarfik Sisimiunut nuussaaq

Saviminilerinermik Ilinniarfiup Nuummit Sisimiunut nuunnissaa oqallisaajuartartoq maanna oqallisaaqqilerpoq.

Ilinniartitaanermut, kultureqarnermut, timersornermut ilageeqarnermullu naalakkersuisup, Inuit Ataqatigiinneersup, Peter Olsenip ilinniarfiup nuunnissaanut ilaatigut pilersaarutit aningaasaqarnerlu misissussallugit maanna nalunaarpoq.

Nunatsinni qinikkat Saviminilerinermik Ilinniarfiup nuunneqarnissaa 1990-kkut qiteqqunnerannili eqqartulerpaat.

Teknikkimik inuussutissarsiornermillu ilinniarfiit ataatsimoortillugit Sisimiuniinnissaat 2017-mi aalajangerneqarpoq. Tassungali sulineq Inatsisartunut aprilimi qinersisoqarnerup kingorna uninngavoq.

AAMMA ATUARUK Aatsitassalerinermik Ilinniarfimmut 7.5 millioninik aningaasaliisoq

Pilersaarutilli maanna suliarineqaqqissapput. Sisimiuni teknikkikkut ilinniarfiit arlariiupput soorlu, Aatsitassalerinermik Ilinniarfik, Sanaartornermik Ilinniarfik aamma Arctic DTU. Taakkua teknikkimik ilinniarfiit sulisuisa ilisimasaat ataatsimoortillugit sumiiffimmi ataatsimiinnissaat pitsaasuusoq Peter Olsen oqarpoq.

- Periarfissanik misissuinissaq pingaaruteqarpoq. Kalaallit Nunaanni Teknikimik Ilinniarfik (KTI) inuiaqatigiinnut taama pingaaruteqartigisoq, ilinniartitaanerup sunniivigeqatigiinnikkut  qaffasissusaata ineriartortinnerata anguneqarnissaa, Peter Olsen allappoq.

Nuummi sulisut nuukkusunngitsut

Saviminilerinermik Ilinniarfimmi Nuummiittumi maanna sulisut illoqarfiit pingaarnersaanniit Sisimiunut nuunnissartik piumangilaat.

Sermitsiaq.AG naapertorlugu tamanna sulisut ilaqutaannut akornutaassaaq maannalu sulisuusut Sisimiunut nuunngippata suliffmmi ilisimasat annaaneqassapput. Taamaattumik maanna sulisuusut Kommuneqarfik Sermersuumi qinikkanit ilinniarfiup Nuummiiginnarnissaanik illersorneqarnissartik ujartorpaat.

- Najukkami politikkerit Saviminilerinermik Ilinniarfiup Nuummiiginnarnissaanut tapersersersuinerat inissaminiissagaluarpoq. Ilinniartitsisut Sisimiunut nuukkusunnginnerat pissutigalugu, ilinniarfimmi piginnaasat annaassavagut, ilinniarfimmi sulisut sinniisaat, ammasumik allakkani atsiortuusoq taama allappoq.

Sulisut Nuummi nutaamik Saviminilerinermik Ilinniarfimmik sanasoqarnissaa kissaatigaat.