Naalakkersuisut Royal Greenlandimut aningasaliisariaqarnerannut tunngasut misissulerpaat

- Isertuunneqarsimanermik oqaaseqarneq, milliardit affaat pineqarmata, aammalu misisigimasoqarmat, naammattumik ilisimatinneqarani taamatut aningaasaliisariaqarneq pinngorsimasoq, taava uagut massakkut Naalakkersuisuusut misigisimavugut, qanorpiaq pisoqarsimaneranik qulaajassalluta pisussaalluta. Aamma oqallisigineqartoq una qaangersinnaaniassagatsigu, Naalakkersuisut siulittaasuat, Kuupik Kleist oqarpoq.

Nunatta Karsia aatsaat taama amigartoortigaluni siorna 2009-mi koruuninik milliardinik amigartoorpoq. Taakkua affaat maannakkut naalakkersuisuusut ikkunnerminni suliffeqarfissuarmut Namminersorlutik Oqartussat pigisaannut Royal Greenlandimut atorpaat, 250 millionit koruunit atukkiullugit, amerlaqataallu piginneqataassutit amerlinerinut atorlugit.

Inatsisartut 2009-mut ilassutitut aningaasaliisutissaattut siunnersuut ualigaa oqaluuserineqarmat, inatsisartunut ilaasortaq Atassummeersoq, Finn Karlsen, oqarpoq, pisut nalaanni naalakkersuisunut ilaasortaanermini paasissutissanik pingaarutilinnik isertuunneqarsimalluni. Tamannalu Naalakkersuisut siulittaasuata ilungersunartutut isigaa.

- Tassa Inatsisartuni oqallinneqaqqilermat, Naalakkersuisut sinnerlugit aalajangerpunga. Taava periutsit qanoq ittut atorlugit qulaajaaneq ingerlatissaneripput ulluni qaninnerni aatsaat paasinarsissaaq, Kuupik Kleist oqarpoq.

Naalakkersuisunut ilaasortaasimasup, Inatsisartuni ilaasortap, Finn Karlsenip, misissuinissamik aalajangerneq ilassilluarpaa. Taassuma aalajangiusimavaa, Royal Greenlandip aningaasaqarnikkut inissisimanera, taamani Naalakkersuisuusut atorfilinnut misissortissimagaat, marsip 23-anni 2009 naammassineqartumik. Kisianni misissuinerup inerneranik apriilip qeqqata missaani naalakkersuisuujunnaarnertik tikillugu ilisimatinneqarsimanatik aamma aalajangiusimavaa.

- Inatsisartut juunimi ataatsimiilermata, misissuinerup inernera Inatsisartunut ilaasortanut aatsaat tunniunneqarpoq, Finn Karlsen oqarpoq.