Naalakkersuisut: RG-ip aningaasaliisarnini eqqarsaatigeqqittariaqarpaa
Naalakkersuisut siulittaasuat Kuupik Kleist qinnuiginnissimanertik pillugu ima oqarpoq:
- Kissaatigaarput aalisarnerup aaqqissuusseqqiffigineqarnerani tamakku nalilersoqqinneqassasut, aammalu Royal Greenland aalisartitseqatigiiffinni annersaasoq aaqqissuusseqqinnermi peqatassasoq, Naalakkersuisut siulittaasuat Kuupik Kleist oqarpoq.
Naalakkersuisut RG-ip siulersuisunut aaqqissuussinermik nalilersueqqusinerat tusarliunneqarmat aningaasaliisarneq illersorlugu SIK-p siulittaasuata Jess G.Berthelsenip tusagassiutinut nalunaarummini nalunaarutigaa.
Aalisartut aalisariutitaarnissaannut aningaasaliinermik ikiorsernerisigut, Royal Greenlandip tunisassiorneq suliffissuarnilu suliffissaqartitsineq taamaalilluni isumannaassagaa, SIK-mit isumaqarput.
Naalakkersuisulli unammilleqatigiinnermut tunngasunut akuliunnianngitsut Kuupik Kleist oqarpoq:
- Uagutsinnut pingaarnerpaajunngilaq unammilleqatigiinnermut tunngasunut akulerunnissaq, kisiannili nalunngisatsituut Royal Greenland aningaasarlioreerpoq, Royal Greenlandillu aningaasaliiffigisimasai aalisartitseqatigiit angallatillu ataasiakkat eqqarsaatigalugit suliffeqarfissuaq ajutuussagaluarpat taakku ataaniittut ilanngullutik ajutoornissaat ulorianartutut isigigatsigu, aningaasaliisarnermut nalileeqqinnissaat kajumissaarutigisimavarput. Pingaarnerpaasutullu isigaarput Royal Greenland inuiaqatigiit aningaasarsiornerannut pingaaruteqaqimmat, aalisarneq patajaatsumik ingerlassasoq, Naalakkersuisut siulittaasuat Kuupik Kleist oqarpoq.
Aalisariutit qassit Royal Greenlandip aningaasaleeqataaffigisimanerai suliffissuarmiit isertugaataavoq. KNR-illu aalisartut aqqutigalugit paasivaa Royal Greenland Uummannami, Ilulissani qasigiannguanilu aalisariutinik arfineq pingasunik aningaasaleeqataasarsimasoq. Taassumallu saniatigut Upernavik Seafoodimilu piginneqataaffeqarnermigut Upernaviup eqqaani aalisariutit aqqaneq marluk aningaasaleeqataaffigisimallugit.
