Naalakkersuisut nutaat aningaasanik naammattusaarisariaqassapput

Qinersinermi neriorsuutitik, tassa meeqqat inersimasullu atugarissaarnerulernissaannik neriorsuinertik, Inuit Ataqatigiit piviusunngortissagunikkik, aningaasanut inatsit nutaaq imminut attassinnaasoq pisariaqartissavaat, Pia Vedel Ankersen oqarpoq.

Aningaasaqarniarneq. IA-p politikkikkut anguniakkaminnik suaarutigisaat Kalaallit Nunaata angingaasatigut nammassinnaasaanik peqartariaqarpoq. IA-p atugarissaarnerulernissaq anguniagaraa, meeqqat, inersimasut. Taamaaliortoqassappallu aningaasatigut inatsisip ataqatiigiissinnissaa pingaaruteqarpoq. Taamaattoqassappallu aningaasanik sippuilluni atuinnginnissaq pisariaqarpoq. Pingaaruteqartut ilagaat namminersulernissarput. Namminersulernissamullu isumaqatigiissummi periarfissat atorluaaniaraanni aamma aningaasanik naleqarpoq. Taamaattumik aningaasaqarneq nammineq nammassinnaasoq qitiulluinnarpoq.

- Aningaasaqarneq pingaarnerpaajusoq oqaruit, taava tamanna qanoq isumaqassava, Royal Greenland ullumi nalunaaruteqarpat assorsuaq aningaasaqarnikkut ajornartorsiorlutik?

- Aap, tassami tamanna qaartartuuvoq siunissaq ungasinnerusoq eqqarsaatigalugu illuatungeriit pilersaarusiuligaanniittoq, taakkua atulersinniarlugu nalunaarutigisaat, tassami aaqqiissutissaagallartumik tuaviinnavik nassaarniartussaapput, aningaasallu taakkua aamma Royal Greenlandimut qularnaveeqqutissat, arlaatigut nassaarisariaqarmata, Naalakkersuisullu Royal Greenlandimut qularnaveeqqusiissappata, taava kingusinnerusukkut taarsigassarsiniarnissaq ajornakusoornerulissaaq. Oqartariaqarpunga naalakkersuisooqatigiit suliassami matumani ajuvissumik atugaqartut.

- Taavami soorlu Finn Karlsen suliassaqarfimmi tassani issiasimasoq sumut inissinneqassava, eqqumiiginanngila maannakkut taama saqqummiussimmat?

- Taama oqartoqarluarsinnaagunarpoq, tassami tamanna sivisungaatsiartumik ilisimasimassavaa, isumaqarpungalu eqqumiilluinnartuusoq.