Naalakkersuisut nikititerput
Ilinniartitaanermut, Kultureqarnermut, Timersornermut Ilageeqarnermullu naalakkersuisunngorpoq, Aqqaluaq B. Egede.
Tamanna tusagassiortunik ullumi katersortitsinermi Naalakkersuisut siulittaasuata, Múte B. Egedep nalunaarutigaa.
Tamanna pivoq Ilinniartitaanermut, Kultureqarnermut, Timersornermut Ilageeqarnermullu naalakkersuisup, Peter Olsenip tassanngaannartumik tunuarnerata kingorna.
Aatsitassanut naalakkersuisoqarfik Aqqaluaq B. Egedep akisussaaffigaa, tamannalu Aningaasaqarnermut Naligiissitaanermullu naalakkersuisup, Naaja H. Nathanielsenip akisussaaffigilissavaa.
Naalakkersuisoq nutaaq ukiuamut aatsaat ivertinneqassaaq.
Meeqqanut, Inuusuttunut, Ilaqutareeqarnermut Peqqissutsimullu naalakkersuisup, Mimi Karlsenip Peqqissutsimut naalakkersuisoqarfik siunissami kisiat akisussaaffigilissagaa, Múte B. Egedep aamma nalunaarutigaa.
Meeqqanut, Inuusuttunut Ilaqutareeqarnermullu naalakkersuisoqarfik nutaamik naalakkersuisoqalernissaata tungaanut tamanna Aqqaluaq B. Egedemit akisussaaffigineqarallassaaq.
