Siumup malittarisassat nutaat isornartorsiorpai: Naalakkersuisut nakkutigineqannginnerulernissaat ernumassutigaa

Naleraq Inatsisartut siulittaasuanut kisimi isornartorsiuinngilaq.  

Siumup Siulittaasoqarfimmit aalajangiiffigisassatut siunnersuutit, partiinit ukiaanerani ataatsimiinnermi suliarineqarsinnaasut, killilersorneqarnerat aamma isornartorsiorpaa.  

Siumup naalakkersuisunut apeqqarissaarnerup atorunnaarsinneqarnera aamma isornartorsiorpaa. 

Siumumit oqartoqarnera naapertorlugu, malittarisassanngortut partiit naalakkersuisunik nakkutilliisinnaanerannik annikillisitsissapput. 

Partiip Siulittaasoqarfimmik isornartorsiuinini pillugu tamanut saqqummiussisimannginnertik, Siulittaasoqarfimmulli septembarip aappaanni tunngaviusumik akerliliisimanini, sulili akissuteqarfigineqarsimanngitsoq tusagassiuutinut nalunaarummi allappaa. 

Tamanna tunngavigalugu inatsisartut aqutsinerat maanna isornartorsiungaatsiarpaat. 

Siumup siunnersuutit tallimat naammagisariaqarai

2026-mi ukiaanerani ataatsimiinnerup nalaani aalajangiiffigisassatut siunnersuutigineqartussat killilersorneqarnerat pingaartumik isornartorsiorpaat. 

Siumut siunnersuutinik 25-nik piffissaliussaq qaangiutsinnagu tunniussisimalluni paasissutissiivoq.  

Partii pisortatigoortumik misissuereernermi aaqqiissuteqareernermilu kingorna, qulingiluanik aalajangiiffigisassatut siunnersuuteqalerlunilu pingasunik naleqqussarnikinnerusunik siunnersuuteqalerpoq.  

Taamaalilluni siunnersuutit aqqaneq-marluk pineqarput, Siumullu naapertorlugu taakkua piumasaqaatit malillugit suliarineqarsimallutik.

Taamaakkaluartoq partiip nammineq naatsorsuutaa malillugu tallimaannarnik aalajangiiffigisassatut siunnersuuteqarsinnaavoq. 

Siulittaasoqarfiup tassunga atatillugu, partiit agguataarneqarnissaannut d’Hondtip periusaa atorsimavaa. 

Siumup inatsisitigut tunngavissamut killiliineq unarpiaq maanna nassuiaqquaa. 

- Inatsisartut suleriaasianni sumi allassimava, aalajangiiffigisassatut siunnersuutit piffissaq eqqorlugu eqqortumillu tunniunneqarsimasut d’Hondt-ip periusiaa tunngavigalugu partiimut agguaassinerup malitsigisaanik suliarineqarnissaasa killilersorneqarsinnaanerat?, Siumut aperivoq. 

Partiip siunnersuutinik tunniussinissamut piffissaliussap qaangiunnerata kingorna malittarisassat allanngorsimanerarpai. 

Akuutitsisimannginnermut isornartorsiuisoq

Siumut Suleriaatsimut Ataatsimiititaliap, periutsip atuutilersinneqannginnerani aggersarneqarsimannginnera akuutinneqarsimannginneraluunniit isornartorsiorpaa.

Partiit tamarmik Ataatsimiititaliami ilaasortaatitaqarput. 

Siumut naapertorlugu, ilaasortat inatsisartuni pisinnaatitaaffiinut malittarisassat tunniussinissamut piffissaliussap qaangiunnerata kingorna allaffissornikkut allanngortinneqassanngillat.

- Periutsit allanngortinneqartussaanngikkaluarput kingornalu aatsaat nassuiaatigalugit, partii allappoq. 

Partii siunnersuutit piffissaq eqqorlugu tunniunneqarsimasut suliarineqartarnerannut tunngatillugu isornartorsiuivoq. 

Ukiaanerani ataatsimiinnermi apeqqarissaartoqassanngitsoq

Siumup naalakkersuisunut ukiaanerani ataatsimiinnermi apeqqarissaartoqassannginnera aamma qisuariarfigaa. 

Partii naapertorlugu, 2025-mi ukiaanerani ataatsimiinnermi akunnerni arfinilinni apeqqarissaartoqarpoq, 2026-milu upernaakkut ataatsimiinnermi akunnerni pingasuni apeqqarissaartoqarluni. 

2026-mi ukiaanerani ataatsimiinnissamut apeqqarissaartoqassanngilaq.

Siumup arlalinnik oqaluuserisassaqartoqarniassammat atorunnaarsitsisariaqarneq taamaattumik apeqquserpaa.

Partiimut tamanna pingaartumik atuuppoq, tassami ukioq manna ukiaanerani ataatsimiinnissaq ullunik 35-nik ataatsimiinnertaqassammat. Sanilliullugu siorna ukiaanerani ataatsimiinnermi ulluni 31-ni ataatsimiittoqarpoq, 2024-milu ulluni 24-ni ataatsimiittoqarluni. 

Allaffissornerulernissaq ernummatigaa

Siumut naapertorlugu, ilaasortat naalakkersuisut apeqqarissaarfigineqarneranni apeqqutinik siumut nalunaarutigineqarsimanngitsunik apeqquteqartarput ingerlaannarlu akissutisisarlutik. 

Tamanna atorunnaarsinneqarpat, apeqqutigineqartut arlallit allaganngorlutik § 37-tut apeqqutinngorsinnaapput. 

Tamanna Inatsisartunut naalakkersuisunullu allaffissornerulersitsisinnaasoq Siumut isumaqarpoq. 

- Allaffissortoqarnerulersinnaavoq inatsisartuniillu nakkutilliisukinnerulersinnaavoq, partii allappoq. 

Apeqqutinut pingasunut akissutissarserusuttoq

Siumut apeqqutinik pingasunik Siulittaasoqarfimmit maanna akissutissarserusuppoq: Killilersuinermut d’Hondtillu periusaanik atuinermi suna tunngavigineqarpa? Sooruna Suleriaatsimut Ataatsimiititaliaq akuutinneqanngitsoq? Sooruna apeqqarissaarfik atorunnaarsinneqartoq, naak Inatsisartut suliarinnissinnaanerisa avataaniittaraluartoq?

- Inatsisartut nunami oqartussaasut qinikkat qullersaraat inatsisiliortut, taakkuuppullu naalakkersuisunik nakkutilliisussat. Siulittaasoqarfiup Inatsisartut nakkutilliinerat killilersornagu illersortussaavaa nukittorsarlugulu, Erik Jensen allappoq.