Naalakkersuisut KNAPK-lu paatsooqatigiipput

Naalakkersuisut isummerfigisussanngorpaat aalisarnerup avataasiortunut sinerissallu qanittuani aalisartunut agguataarnera atorunnaarsinneqassanersoq.

- KNAPK-miit akuersaarsinnaanngilluinnarlugu erseqqissaatigissaatigissavarput, KNAPKp siulittaasua Leif Fontaine naalakkersuisut siulittaasuata Kuupik Kleistip ammaanermi oqalugiaataanut oqaaseqaammini allappoq.

Kuupik Kleistip inatsisartut ukiaanerani katersorneranni ammaannermi oqalugiaammini allappoq aalisarnernerup avataasiortunut sinerissallu qanittuani aalisartunut agguataarnerata atorunnaarnissaa isummerfigisussanngoraat.

- Kangerlunni imartap kilisaasssuarnut aammaanneqarnissaa akerlerilluinnarparput sinerissap qanittuani aalisarnerup sequmilluinnarneqarnissaanik kinguneqartussaammat, Leif Fontaine oqarpoq.

Tamannali paatsuuinermik tunngaveqartoq naalakkersuisut isumaqarput.

- Pilersaaruteqanngilagut kilisaassuit kangerlunni aalisarsinnaanerisa ammaannissaanut, aalisarnermut naalakkersuisoq Ane Hansen KNR-imut oqarpoq.

Aalisarneq pillugu ataatsimiititaliarsuaq inassuteqartuuvoq aalisarnerup marlunnut avinneqarsimanerata atorunnaarsinneqarnissaanik.

- Periusissatut misissorneqartoq tassaavoq sømilikkaartumik angallatit sumi aalisarsinnaanerisa killilersornissaa. Assersuutigalugu taasinnaavarput sinerissamiik sømilit aalajangersimasut iluanni kilisaassuit aalisarsinnaatitaassanngitsut. Eqikkaasumik oqaatigisinnaavarput kilisaassuit kangerlunni aalisarsinnaalernissaat akuersaalersaanngikkipput, Ane Hansen oqarpoq.

KNAPKp inatsisartuni partiit maanna kajumissaarpai aalisarnerup marlunnut avinneqarsimanerata atorunnaarsinniarnera taamaatissagaat.

- Tamanna paatsuinermik tunngaveqarpoq. Isumaqarpunga siunnersuut tapersersorneqarnerulerumaartoq immikkuualuttut iserfigilluaraanni, Ane Hansen oqarpoq.

Taanna nalunaarpoq aalisartut kattuffiit oqaloqatiginiarlugit siunnersuutip suliarineqarnissaanut atatillugu.