Naalakkersuisut: Kalaallit Nunaata Danmarkillu akornanni timmisartuussisalernissat isumaqatiginniutigineqartut
Nunatta ammaqqinnissaa naalakkersuisut sulissutigileruttorpaat, tassungalu atatillugu
Kangerlussuup Kastrupillu mittarfiata akornanni imarpik qulaallugu timmisartuussinissat pillugit isumaqatiginniartoqarpoq.
Ineqarnermut Attaveqaqatigiinnermullu Naalakkersuisoqarfik taama ilisimatitsivoq
Timmisartuutileqatigiiffiup Air Greenlandip Kangerlussuup Købehavnemilu mittarfiup akornanni timmisartuussisalernissaanik isumaqatigiissutip nutaap sapaatip akunerata tulliuttup aallartinneqarneran piareernissaa naaatsorsuutigineqarpoq.
- Kalaallit Nunaata Danmarkimiit tikittartunut ammaassiartornera ilutigalugu Kalaallit Nunaannut timmisartumi inissat piumaneqarneri annertusisussaapput. Kisiannili ilaasussat aasaanerani ilaasartunit nalinginnaasunit ikinnerungaatsiassapput, Ineqarnermut Attaveqaqatigiinnermullu Naalakkersuisoq Karl Frederik Danielsen taama oqarpoq.
Aasaanerani timmisartuussisarnernit nalinginnaasumik ilaasartut ikinnerunissaat peqqutaalluni maanna timmisartuussinerit akuttoqatigiissarlugit ingerlaartittarineqarisigut tamanna qulakkeeriffiussaaq inuiaqatigiit akuerisinnaasaat, Air Greenlandillu aningaasaqarneratigut kivitseqataaffiusussaq sularineqaleruttorpoq.
Ineqarnermut Attaveqaqatigiinnermullu naalakkersuisup oqarnera naapertorlugu isumaqatigiissummut paasissutissat annertunerusut sapaatip akunnerata tulliani saqqummiunneqassapput.
Nuummi coronavirusimik tunillatsittoqarsimasoq paasineqarmat, nunatsinniit avammut timmisartuussinerit marsip 21-anili matuneqarput .