Naalakkersuisut inuussutissarsiornerup iluani aamma naalakkersuipput
KNI-mi eqqissiviilliortoqarnera kiisalu Inatsisartuni ungasinngitsukkut oqallittoqanerani politikerit qullersat suliffeqarfiit pingaaruteqarnerit siulersuisuini kalaalinngorsaasoqarnissaanik piumasaqarnerat tamatumunnga tunuliaqutaavoq.
Professionelinik nunanit allaneersunik nunaqavissunik taarsersuerujussuartoqalerneranik ernumassutigineqalerpoq.
- Pisortat suliffeqarfiutaanni siulersuisut aappaagu ataatsimeersualerpata taarsersuisoqarnissaa amerlasuunit ernumassutigineqarpoq, suliffeqarfimmik aqutsisoq, sammisap oqallisiginissaanik qunusut allat assingalugit, kinaanerminik isertuussisoq taama oqarpoq.
Politikenimit aamma allaaserineqarpoq Namminersorlutik Oqartussat suliffeqarfinni pissaanilittut inissisimasoq. Ilaatigut Kalaallit Nunaanni suliffissuit annersaanni Royal Greenlandimi, pisiniarfiutilissuarmi KNI-mi, umiarsuaatileqatigiiffiillu annersaanni Royal Arctic Linemi.
Kalaallit Nunaanni Sulisitsut Kattuffianni pisortap Brian Buusip, politikerit imminnut assortortumik pissusilersortarnerat suliffeqarfinni namminersorlutik oqartussat pigisaanni annertuumik ajornartorsiortitsisarsimavoq.
- Killeqanngitsumik unammilleqatigiittoqarnissaa arlalitsigullu namminersortunngorsaasoqarnissaa kissaatigineqarpoq, peqatigisaanilli aamma niuerfik nakkutigalugulu aqunniarneqarluni. Tamanna pitsaasuunngilaq, oqarpoq.
Air Greenlandip siulersuisuini siulittaasoq, Jens Wittrup Wilumsen, oqarpoq, naalakkersuisuusimasut 2009-mi aalajangertut pisortat suliffeqarfiisa professionelinik pisotalersorneqarnissaannik aalajangiussaqarsimasu.
- Taamaaliornikkut najoqqutassiortoqarlunilu ammasumik ingerlatsisoqalerpoq, taamatullu professionalinngorsaasoqarnera pitsaalluinnartutut isigaara, Politikenimut oqarpoq.
Pissaanerli marsip qaammataani Siumumit tiguneqarpoq allatullu ingerlatsisoqartussanngorluni, Politiken allappoq, Siumup Inatsisartunut ilaasortaatitaasa siulittaasuata Jens Immanuelsenip oqaatigisimasaa innersuussutigalugu.
Inatsisartut ukiakkut ataatsimiinneranni oqallinnermi ima oqarpoq: - Suliffeqarfiit namminersorlutik oqartussanik pigineqartut tamakkiisumik kalaalinngorsaavigineqarnissaannut piffissanngunnginnerluni?
Taamatut apeqquteqarnermini sunarpiaq pineraa Politikenip paasiniarsimagaluarpaa - Jens Immanuelsenilli Siumullu tamanna oqaaseqarfigerusussimanngilaat.
