Naalakkersuisut ilinniartitaanikkut neriorsuuteqarniarput
Kollegianik sanaartornerunissaq nukiginnarsivoq ilinniagaqalernissamut aporfiuallaalersinnagu. Tamannami aporfinngoratarsinnaavoq Naalakkersuisut kissaataannut inuusuttut ilinniagaqarsinnaanerannik neriorsuuteqarsinaalernissamut.
Ilinniartitaanikkut neriorsuuteqarnissami pineqarpoq meeqqat atuarfianniit soraarummeertut tamarmik neqeroorfigineqarsinnaalissasut ilinnialersinnaanermik. Tamatumali angunissaanut aqqut suli takivoq. Tassami meeqqat atuarfianniit soraarummeertartut amerlapput qallunaatut, matematikimi aamma tuluttoornermi piginnaasamikkut inorsartut ilinniagaqarlersinnaanissamut. Aningaasaqarnikkut Ingerlatsineq pillugu nalunaarummi Naalakkersuisut ataasinngormat agguaassaanni tamanna atuarneqarsinnaavoq.
- Amerlaqaat kollegiani inissaaleqineq praktikkerfissaaleqinerlu pissutigalugit utaqqisunut inissinneqarallartartut, Naalakkersuisut allapput.
Meeqqat atuarfiata aamma pikkoriffiginerulertariaqarpaa inuusuttut ilinniagaqalernissamut piareertissinnaanerat. Tassami soraarummeertut 20 procentiinnaat atuagarsornikkut pikkorissilluarsimasuusarput 10 procentit atuagarsornikkut sanngiitsuusartut. Aamma Aningaasaqarnikkut ingerlatsineq pillugu nalunaarummi atuarneqarsinnaavoq Piareersarfinni inissat 70 procentii atorneqartartut inuusuttunut fagini ataasiakkaani pikkorisseqqinniartunut. Piareersarfiit siunertarpiarigaluarpaat inuit sulisinnaareersut atorfinni siuariartorfiunerusuni ilinnialersinnaanissamut pikkorissarnissaat.
Naalakkersuisut nassuerutigaat ilinniartitaanerup qaffassarnissaa aatsaat pisinnaasoq meeqqat atuarfiata nukittorsarneratigut. Inuusuttullu ilinnialersinnaasut amerlissappata suli amerlanerusunik aningaasaliinissaq pisariaqassaaq. Tassami qulakkeerneqartariaqarput kollegiani inissat, ilinniartitsisut inillu atuartitsiviit amerlinissaat.
Ilinniartitaanikkut pilersaarummik aqutsisut nalilerpaat kollegiani inissat nutaat 300-400-ut ukiuni tulliuttuni pisariaqartinneqassasut.
