Naalakkersuisut erseqqissaassuteqalersut: Politiit angerlarsimaffinnut isersinnaanngussanngillat

Eqqartuussivimmit akuersissuteqaqqaarani angerlarsimaffinnut isersinnaalernissamik inatsisissatut siunnersuuteqarneq KNR-imit allaaserineqareersorlu Naalakkersuisut siunnersuutigisartik allanngortinnialerpaat.

Politiit oqartussallu eqqartuussisumit akuersissuteqaqqaaratik ininut - aamma angerlarsimaffinnut - isersinnaanngorlugit Naalakkersuisut "nappaatip nalinginnaasumik tamanut ulorianartup siaruarnissaa pinaveersaartinniarlugu siaruarnaveersaartinniarluguluunniit" siunnersuutaanni atuarneqarsinnaavoq.

Paragraffili taanna taama siunertaqanngikkaluartoq Naalakkersuisut inatsisilerituaata KNR-imut erseqqissaatigaa. Paragrafilu taanna maanna paasiuminarninngorlugu naqqiuteqarfigineqalerpoq.

Paragraf 6:
Naalakkersuisut nunami maani nappaatip nalinginnaasumik tamanut ulorianartup siaruarnissaa pinaveersaartinniarlugu siaruarnaveersaartinniarluguluunniit tamanna pisariaqarpat, katerisimaartitsinerit aaqqissuussinerit, pisussat il.il. ingerlanneqarnissaannut inerteqqutit pillugit maleruagassanik aalajangersaasinnaapput. Maleruagassat imm. 1 naapertorlugu aalajangersarneqartut illup iluani, silami, pisortat inuillu katerittarnerinut, pisunut il.il. tunngasinnaapput. Maleruagassat imm. 1 naapertorlugu aalajangersarneqartut inatsisinik allanik saneqqutsisinnaapput.

Imm. 2. Naalakkersuisut malittarisassanik aalajangersaasinnaapput eqqartuussiviit akuersiseqqaarnagit imm. 1-imi aalajangersakkat malinneqarneri nakkutiginiarlugit ininut allanullu isertoqarsinnaaneranut tunngasunik nakkutilliinissaq siunertaralugu.

Naalakkersuisut oqaaseqaataani ima allassimavoq:
Maleruagassat illup iluani, silami, pisortat inuillu katerittarnerinut, pisunut il.il. tunngasinnaapput.

- Naalakkersuisut siunnersuutaanni angerlarsimaffiit ilanngunneqarnissaat siunertaanikuunngisaannarpoq. Taannalu erseqqissarniarlugu inatsisissap nassuiaatitaanut maanna ilanngupparput, inatsisinut atuutsitsinermut naalakkersuisoq Martha Abelsen oqarpoq.

Paragraffikkut tassuuna inuit pisinnaatitaaffii inatsimmi tunngaviusumi allassimasut killilerneqassasut, Inuit Pisinnaatitaaffii pillugit Siunnersuisoqatigiit tikkuaraat, KNR-imi ataasinngormat allaaseraarput.

Naalakkersuisut siulittaasuata Kim Kielsenip tusagassiortunik ataasinngormat katersortitsinermini politiit oqartussallu eqqartuussisumit akuersissuteqaqqaaratik angerlarsimaffinnut isersinnaanngornissaannik siunnersuuteqaratik oqaatigaa.

Naalakkersuisulli paragraffi tassa maanna allanngortinnialerpaat. Allannguinerlu Inatsisartut aqagu pingasunngornermi ataatsimiilinnginneranni saqqummiunneqassaaq. Naalakkersuisut inatsisilerituuat KNR-imut taama paasissutissiivoq.

 

AAMMA ATUARUK Inatsit nukingiussaq: Politiit angerlarsimaffinnut akuersissuteqaratik isersinnaalissapput

Paragraffilu pineqartoq angerlarsimaffinnut atuutissanngilaq, inilli allat pineqarlutik.

Nappaatit tunillaassortut akiorniarlugit iliuutsit pillugit Inatsisartut peqqussutaanni allannguutissatut siunnersuutit arlaqarput. Pinngitsaaliilluni katsorsaasinnaaneq inerteqqutillu assigiinngitsut.

Inatsimmut allannguutissatut siunnersuummi inatsisissaq 2021 naanissaata tungaanut atuutissasoq siunnersuutigineqarpoq. Piffissaliussarlu sivisuallaartoq partiit arlallit oqaatigereerpaat.

AAMMA ATUARUK Tvangsbehandling og forbud: Det skal Inatsisartut stemme om

 

Isummersuutit