Naalakkersuisut eqqumiitsuliornermut piorsarsimassutsumullu periusissiorput
Ileqqorissaarnerup ileqqorinnerullu killingi ataqqillugit eqqumiitsuliornermi piorsarsimassutsimillu peqqusaarnerit siammarneqarnissaat kissaatigalugu Naalakkersuisut periusissiaminni allapput. Periusissiaq qimerluualaarparput:
Nunatta oqaluttuassartaa ilisimatusarfigineqaqaaq, ilisimatusarnerilli inerneri nunatsinni pissarsiariuminaattarput. Ilisimatuut suliamik inerneri pillugit paasissutissiisalernissaannik piumaffigisalernissaat siunnersuutigineqarpoq. Niuernermi takoqqusaarutit tamarmik kalaallit oqaasii atorlugit pinissaat aamma piumasarineqassaaq.
Timersornerup tungaatigut nunanik allanik suleqateqartarnerneq annertusarniarneqarpoq. Nipilersoriaaseq apeqqutaatinnagu inuit immikkut ilinniarsimasut ilinniartitsisarnerat siuarsarneqassaaq, nipilersortartut namminneq ineriartorsinnaanissaannik sakkussaqalerniassammata. Ilaatigut tamakkuupput Naalakkersuisut Eqqumiitsuliornermut Piorsarsimassutsimullu Periusissiaanni siunnersuutigineqarsimasut.
Nutaaliorneq, imminut nappassinnaaneq, oqallitsitsilerneq aamma ataatsimoorneq Naalakkersuisut naleqartitaminnik pingaarnersiuinerminni aallaavigaat.
Naalakkersuisut suliniarfissat qulit siunniuppaat, taakkulu isumasiuisarfiup HS Analysep siorna novemberimi misissuineranit aallaaveqarput. Suliniuteqarfissat tassaapput piorsarsimassutsimi kingornussat, oqaatsit, timersorneq, tusagassiorneq, kusanartuliorneq, atuakkiorneq, nipilersorneq, assilialiortarneq, isiginnaartitsisarneq isiginnaartitsivinnilu takutitsisarneq aamma filmiliortarneq.
Aningaasanut Inatsimmi tapiissutinik allaffissornermi aqutseriaaseq Naalakkersuisut allanngortikkusuppaat. Ullumikkut atuuttut malillugit ukiut aningaasaliiffiusut akornanni aningaasaliissutinik nuussinissaq inerteqqutaavoq, tamatumalu kingunerisaanik suliniutit sivisunerusut assersuutigalugu filmiliornerit ajornakusoortilersinnaavai. Tamannalu allanngortinniarneqarpoq.
Eqqumiitsuliornermi piorsarsimassutsimullu siunertanut ukiumut 140 milion koruunit missaannik aningaasaliisoqartarpoq, taakku saniatigut kommuunit 100 million koruuninik immikkoortitsisarput. Tusarniaaneq ataasinngormat naammassivoq.
