Naalakkersuisut Kalaallit Nunaannit Danmarkimut suli Namminersornerullutik Oqartussaqalinngitsoq meeravissianngortitanut tunngasunik Danmark suleqatigalugu qulaajaanissaq ammaffigaat.Assi: Paalu Møller/KNR

Naalakkersuisut: Allagaatit meeravissiartaarnermut tunngasut qulaajarneqassagunartut

Naalakkersuisut suli Namminersornerullutik Oqartussaqalinngitsoq meeravissiartaarnernut tunngasunik misissuisitsilersaarput.

Kalaallit meerartaat hunnorujukkuutaat angajoqqaaviminnit avissaartitaallutik suli Namminersornerullutik Oqartussaqalinngitsoq meeravissianngortitaapput.

Tamanna Ilisimatusarfimmi maanna rektorip, Gitte Adler Reimerip, nunatsini ilaqutariinnermut pissutsit misissuiffigisani pillugit ilisimatuutut 2010-mi allaatigisaani kisitsisini erserpoq.

Kalaallit Nunaannit danskinut aappariinnut 1964-ip 1979-illu akornanniinnaq meeravissianngortitaasimasut 257-iusut allaatigisaani erserpoq.

Taamanikkut meeravissianngortitat ilarpaalui allagaatinik meeravissianngortitaanerminnut tunngasunik maanna ujartuillutillu meeravissianngortitaanerminnik namminneq angajoqqaatillu kingunerlutsitsinerminnik qaangiiniarnissaminnut ikiortissarsiortarput.

AAMMA ATUARUK Margretemut tapersersuisut: Meeravissiartaat pillugit paasissutissarsiortut ikiorneqartalerlik

Naalakkersuisullu taamaaliornerannut paasinnipput.

- Naalakkersuisut taama kissaateqarnerannut paasinnilluarput. Kalaallit meeravissianngortitaasimasut paasissutissanik amerlanerusunik pissarserusuttunik siunnersortikkusuttunillu aamma ilaqarsinnaapput, isumaginninnermut naalakkersuisoqarfik KNR-imut allappoq.

Danskit naalagaaffiat suli Namminersornerullutik Oqartussaqalinngitsoq meeravissianngortitsinernut akuersissuteqartarsimammat, Naalakkersuisut Danmark suleqatigalugu sulianik taakkununnga tunngasunik misissuisitsilersaarput.

- Danmarkimi oqartussat meeravissianngortitaasimasut kissaataat aallaavigalugit qulaajaanertalimmik suliniuteqalernissaq pillugit oqaloqatigisalersaarlugillu suleqatigillualersaarpagut, naalakkersuisoqarfik ilisimatitsivoq.

Meeravissianngortitaasimasulli kissaataat danskit naalakkersuisuinut Naalakkersuisunit suli saqqummiunneqarsimanngitsut, danskit isumaginninnermut ministereqarfiat ilisimatitsivoq. Taakkuali Naalakkersuisunit attavigineqarnissaminnut piareersimapput.

Meeravissianngortitaasimasut: Paasissutissiillutilu ikiorsiigitsi

Allagaatit 1950-ikkut 1979-illu akornanni meeravissianngortitanut tunngasut ataasiaannaratik oqallisaapput.

Danskip tusagassiortuullunilu atuakkiortuusimasup, tassa Tine Bryldiugaluup Kalaallit Nunaannnit meeravissianngortitaasimasut allaatiginikuuai.

Danskit aviisiat Information Kalaallit Nunaannit meeravissianngortitat unikkaarpaaluinik siorna ilanngutassiaqarpoq. KNR-illu Ilulissani anaanavimminit danskinut aappariinnut 1951-imi meeravissianngortitaasimasoq, Margrete Johansen, aamma allaatigalugu.

AAMMA ATUARUK 1951-imi meeravissiartaarneq: Margrete sikaritsinut poortanut marlunnut taarsiunneqarluni meeravissianngortitaavoq

Kalaallit meerartaat miligaataasimasut 22-t pillugit qulaajaasoqarsimaneratulli Kalaallit Nunaannit meeravissianngortitat pillugit aamma qulaajaasoqartariaqartoq, Margrete Johansen, Folketingimi ilaasoq Aaja Chemnitz Larsen (IA) Gitte Adlmer Reimerilu aamma isumaqarput.

Kalaallit Nunaannillu meeravissianngortitaasimasut taakkulu ilaqutaat ikiorsiinermik aamma neqeroorfigitittariaqartut,  taakku isumaqarput.

Inatsisartunut qinersisussanngornitta kingunerisaanik Naalakkersuisoqatigiinngortut tamanna pillugu qanoq pisoqassanersoq aalajangertussanngorpaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat