Naalakkersuisut akuliuttariaqalilerput

Alcoap Maniitsup eqqaani aatsitsivissualiorniarneranut aalajangernissaq, suliffeqarfissuup Naalakkersuisunut tuavisaarutigaa. Aalajangigassat pingaarutillit piaartumik aalajangerneqanngippata, aluminiumik aatsitsivissap siunissaa nalunarsisinnaavoq.

Alcoa utaqqisinnaajunnaavippoq. Tamanna Naalakkersuisut Ottawami Canadamiittumi, Alcoamik ataatsimeeqateqareerneratigut nalunaarutigineqarpoq. Alcoamiit piumasarineqarpoq aatsitsivissuarmik sanasoqarnerani, Alcoap aningaasartuutissai annikinnerussasut.

Tamanna pillugu aatsitassaqarnermut Naalakkersuisoq Ove Karl Berthelsen ima nassuiaateqarpoq:

- Tusaasinnaasarput paasisinnaasarpullu malillugu, Alcoa ima oqariartuuteqarpoq Alcoa pillugu isummertoqanngippat taava ajunnginnerutinneqartoq pilersaarut unitsinneqaannaruni. Tassani pineqarpoq, avataaninngaaniit suliartorallartussat pillugit nunatsinniit isummertoqarnissaanik piumasap suli naammassineqannginnera, Ove Karl Berthelsen oqarpoq.

Misissuinerit takutissimavaat, Kalaallit Nunaanni suliffeqarfinnik ingerlatsineq, nunanit allaniit ingerlatsinermut naleqqiullugu akisunerusoq.

Alcoa piumasaqarpoq, nunanit allaniit nunatsinnut suliartorsinnaasussat pillugit, piumasaqaatit misissoqqinneqassasut. Taamaanngippat tassa aluminiumik aatsitsiviliornissaq nalorninartorsiulersinnaavoq. Aatsitassaqarnermut Naalakkersuisumiit oqaatigineqarpoq, Naalakkersuisut Alcoalu naapeqatigeeqqissasut qaammatit pingasut qaangiuppata, tassanilu Naalakkersuisut avataaniit suliartortoqarsinnaanissaa pillugu naliligartik Alcoamut tusarliutissallugu.

Naalakkersuisut Alcoameersunik oqaloqateqarneranni erserpoq, Alcoap SIK-mik Sulisitsisullu Peqatigiiffiannik GA-mik oqaloqateqarnermini angusani naammagisimaanngikkai.

Ove Karl Berthelsenimiit oqaatigineqarpoq, SIK GA-lu piaarnerpaamik oqaloqatigineqassasut.