Naliliisartoq: Naalakkersuisut Air Greenlandimik pisinerat isumassatsialaavoq
461 millionit koruunit oorerpassuupput, Air Greenlandilli pisortaanerata Jakob Nitter Sørensenip tamanna niuerluarnertut nalilerpaa.
- Isumaqatigiissut pitsaalluinnartuusoq isumaqarpunga. SAS-imut naalagaaffimmullumi isumaqatigiissut qujarunnarpoq, ukiunimi arlalinni piginneqataanertik tuniniarsarinikuuaat. Minnerunngitsumillu Namminersorlutik Oqartussanut iluaqutaassaaq. Namminersorlutimmi Oqartussat maanna nammineerlutik Air Greenlandip sammivissaa aalajangersinnaanngorpaat.
Pisortaanerullu naliliinera Jakob Pedersenimit timmisartuussisarneq pillugu naliliisartumit taperserneqapoq.
- Kalaallit Nunaanni mittarfeqarnikkut aaqqissuussaanerup tamarmiusup allanngortiteriffigineqarneranut atatillugu iliuuserineqartunut tunngatillugu Air Greenlandip Namminersorlutik Oqartussanit tamakkiisuik pigineqalernera naleqquttuuvoq, KNR-imut oqarpoq.
Air Greenlandip pisortaanerata Jakob Nitter Sørensenip Air Greenlandip pisiarineqarnera nuannaarutigaa, isumaqaarami tamanna angallannermut billetsit akikinnerulernerannik kinguneqassasoq.
- Nunatsinnit tamakkiisumik pigineqalernitsigut ataasiinnarmik piginnittoqalerpugut, taamaalillunilu anguniagaq ataasiinnaalerpoq. Tamannalu tulluusimaarutigaara, aamma sulisutta tulluusimaarutigaat, peqatigiillutami nutaanik mittarfeqalernissarput piareersarfigisinnaavarput timmisartuutivullu nutaanngorsarlugit, aamma siunissami pisariaqartinneqartunut naleqquttunik aningaasaliisinnaavugut siunissamilu nioqqutissanik pitsaasunik, isumannaatsunik akikitsunillu tunniussaqarsinnaalissalluta.
Naliliisartup Jakob Pedersenip Air Greenlandip pisiarineqarnera billetsit akiinut qanoq sunniuteqassanersoq oqaatigisinnaanngikkallarpaa, siunissarli ungasinnerusoq eqqarsaatigalugu iluaqutissartaqassangatippaa:
- Mittarfeqarfinnik ineriartortitsinerup Air Greenlandillu ineriartortinneqarnerata ataqatigiissinneqartussanngornerat atuisartunut iluaqutaasussatut nalilerpara, Jakob Pedersen oqarpoq.