Naalakkersuisut aalisarnermut ilinniarfiit siunissami nutarsarniaraat

Naalakkersuisut aalisarnermi inuussutissarsiummi siunissami pisariaqartinneqartut qulakkeerniarlugit nunatsinni aalisarnermik ilinniarfinnik nutarsaanissamut suliarujussuarmik aallartitsipput.

Naalakkersuisut tusagassiuutinut nalunaarummi paasissutissiipput.

Suliniut apriilip 18-iannit 19-iannut sapaatip akunnerata naanerani aallartinneqarpoq, tassani Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik aamma Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik Ilulissani siullermeertumik workshoppertitsillutik.

Tassani inuussutissarsiummik ingerlataqartut, suliassaqarfimmi kattuffiit, ilinniarfinnit, Kalaallit Nunaanni Ilinniartitaanermut Siunnersuisoqatigiit oqartussallu attuumassuteqartut ataatsimoortillugit peqataatinneqarput.

Workshoppimi siunissami aalisarnermut ilinniarfiit piginnaanngorsaqqiinissamik, ilinniartitaanerup imarisanik inuussutissarsiummilu ineriartortitsinernik ataatsimut tunngaveqartumik ineriartortitseqqinnissaq siunertaavoq.

Piginnaasat ilinniakkallu imarisaasa sammineqarnerat

Workshoppernermi ulloq siulleq ilinniarfinnut aamma piginnaasanut siunissami aalisartut pigisassaannut tunngassuteqarpoq.

Peqataasut ilinniarfinni neqeroorutit inuussutissarsiortut pisariaqartitaannut qanoq naapertuuttunngortinnissaannut aaqqissuussisoqassanersoq oqaluuseraat.

Siornatigut inassuteqaatit, atuartitsissutaasinnaasut nutaat aamma aalisarnermut tunngasumik suliaqarnermut atuarfimmik pilersitsisoqarsinnaanissaa uani ilaatigut oqaluuserineqarpoq.

Nutaaliorneq nunanilu tamalaani misilittakkat

Nutaaliorneq aamma inuussutissarsiummik ineriartortitsineq ullup aappassaani sammineqarput, tassanilu Islandimiut aalisarnermi attaveqaataat Iceland Ocean Cluster kiisalu nunatsinnit nunanilu tamalaanit aalisarnermik suliaqartunik ilaatigut saqqummiisoqarluni.

Oqallinnermi aalisarnermi nutaaliorneq ilinniarfinnut siunissami piumasaqaatinut qanoq sunniuteqarsinnaanera aamma inuussutissarsiutip qanoq ineriartortinneqarlunilu nutaaliorfiusinnaanera oqaluuserineqarpoq.

Suleqatigiissitat suliamik ingerlatseqqissasut

Malitseqartitsinissaq pissutigalugu suleqatigiissitanik inuussutissarsiummit ilinniarfinniillu peqataaffigineqartumik maanna pilersitsisoqarpoq.

Taakku workshoppimi oqaluuserineqartut tigussaasunngortissavaat.

Misilittakkanik suliamik ingerlatitseqqinnermi ilanngussinissap qulakkeernissaa ilaatigut anguniarneqarpoq, tamannalu Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiup malitseqartitsivigalugulu ingerlateqqissavaa.

- Ilinniakkatta inuussutissarsiutini ineriartornermut malinnaanissaat pingaaruteqarluinnarpoq, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Nivi Olsen (D) oqarpoq.

Aalisarnermut, Piniarnermut, Nunalerinermut Imminullu Pilersornermut Naalakkersuisup, Peter Borgip aalisarneq nunatsinni inuiaqatigiinni pingaarnersaasoq erseqqissaatigaa.

Taamaammat aalisarnermi ilinniarfiit nukittorsarneqarnissaat politikkikkut pingaartinneqarluinnartoq erseqqissaatigaa.

- Suliami tunniusimallutik peqataasorpassuaqarnera nuannerpoq, naatsorsuutigineqarlunilu inuussutissarsiummik inerisaanermut suliamut suli immersuisoqarumaartoq, Peter Borg oqarpoq.

Eqaannerusumik ilinniartitaanermut aaqqissuussisoqassasoq

Workshoppertoqarnera aalisarnerup iluani ilinniartitaanermut aaqqissuussinerup eqaannerulernissaanut ’pingaaruteqartumik alloriarnerusoq’ tusagassiuutinut nalunaarummi erseqqissaatigineqarpoq.

Naalakkersuisoqarfiit workshoppertoqarnerani inernerit inuussutissarsiortunik qanimut oqaloqateqarnikkut aamma oqaluuserineqartunik nunatsinni aalisarnermi siunissami ilinniarfiit pillugit tigussaasunngortitsinissaq suliareqqissavaat.