Naalakkersuisup Nukissiorfinni soraarsitsinissamik pilersaarutit unitsikkallarai
Nukissiorfiit allaffeqarfiini katillugit 17-ini ornigulluni sullinneqartoqarsinnaajunnaarnissaa ingerlatseqatigiiffiup sapaatit akunnerata siuliani nalunaarutigaat.
Taamaalilluni 13-inik soraarsitsisariaqassallutik.
Tamannali nukissiuuteqarnermulli naalakkersuisup, Steen Lyngep, maanna unitsikkallarpaa, nassuiaateqartoqarnissaanillu qinnuteqarluni.
- Qaanaaq
- Upernavik
- Uummannaq
- Qeqertarsuaq
- Ilulissat
- Qasigiannguit
- Aasiaat
- Kangaatsiaq
- Sisimiut
- Maniitsoq,
- Nuuk
- Paamiut
- Narsaq
- Qaqortoq
- Nanortalik
- Tasiilaq
- Ittoqqortoormiit
Tamanna Namminersorlutik Oqartussat suliffeqarfiutaata Nukissiorfiit tusagassiuutinut nalunaarutaanni paasissutissiissutigineqarpoq.
Nukissiorfiit pitsanngorsaaniartoq Steen Lynge tusagassiuutinut nalunaarummi allappoq, soraarsitsisoqarnissaali ajuusaarutigalugu.
- Taamaattumik Naalakkersuisut sinnerlugit Nukissiorfiit qinnuigisimavakka nassuiaateqarfigissagaat suliap tamatuma qanoq ingerlanneqarsimanera, atorfeqartitsinermut atatillugu atugassarititaasut tamarmik eqqortumik ingerlanissaat qularnaarumallugu, Steen Lynge allappoq.
AAMMA ATUARUK Nukissiorfiit qaammatini arfineq pingasuni direktøreqarsimanani nutaamik pisortartaassaaq
Nukissiorfiit ’digitalinngorsaanermik’ annermik suliniummik aallartitsigaluarpoq, tassanilu atuisut sullinneqarnerata ilarujussua internetti aqqutigalugu ingerlanneqalissaaq.
Tamanna sukkanerulersitsillunilu sullissinermut pitsaanerulersitsissasoq, Nukissiorfiit oqaatigaat.
Nukissiorfiit aningaasaqarnermut pisortaat, Claus Andersen-Aagaard sulisunik ikilisaaniarnermut tunngatillugu apersorneqarsinnaasimanngilaq.
Kisianni sulisut 13-it tikillugit soraarsinneqarsinnaasimassasut paasissutissiissutigaa.
- Sulisut pineqartut ilaat oqaloqatigileruttorpagut, Claus Andersen-Aagaard KNR-imut mailikkut Steen Lyngep suliamut ilanngutinnginnerani allappoq.
Utoqqaat arajutsisimaneqanngitsut
Ornigulluni sullinneqarsinnaajunnaartoqassagaluarpalli ingammik utoqqaat digitalimik atortorissaarutinik atuinissamik ajornartorsiortut eqqarsaatigineqassasut Claus Andersen-Aagaardip oqaatigaa.
- Innuttaasut utoqqaat ilaat smartphonesit internettillu atornissaat unammillernartissinnaagaat arajutsisinngilarput. Taamaammat taakku atuisunut sullissivitsinnut sianertarsinnaapput, oqarasuaatikkut ikiorneqartassallutik soorlu ullumikkut taamaattoqartartorujussuusoq, Claus Andersen-Aagaard oqarpoq.
