Naalakkersuisup Kirsten L. Fenckerip napparsimalluni sulinngiffeqarnissani qinnutigigaa

Peqqinnissamut naalakkersuisoq Kirsten L. Fencker napparsimalluni sulinngiffeqarnissaminik Naalakkersuisut siulittaasuannut qinnuteqarpoq.

Politikeri Facebookikkut ippassaq sapaammi taama nalunaaruteqarpoq.

Kirsten L. Fencker decembarip naanerani uippakajaanermik eqqugaasimalluni allappoq. Suliartoqqikkaluarlunilu tamanna nangeqqissimalluni.

- Ukiup naalernerani stressimik eqqugaavunga, qaangeriartuleraluarlugulu utertoorutigeqqikkakku Naalakkersuisut Siulittaasuannut sulinngiffeqarnissara allakkatigut qinnutigaara.

- Suliassaqarfinni suliassarpassuaqarpoq maanna ulapputigisariaqakkanik. Peqqissuserali maanna pitsaanngimmat ilaquttakka peqatigalugit nukittorsarnissara pisariaqartikkakku paasinnilluartoqarumaartoq neriuutigaara, Kirsten L. Fencker Facebookimi ilaatigut allappoq.

Taassuma apersorneqarnissani kissaatiginngilaa.

Kirsten L. Fencker Múte B. Egedep naalakkersuisuutitaqarnerata nalaani uippakajaanerminik eqqugaasut aapparaat.

Meeqqanut naalakkersuisoq, Eqaluk Høegh uippakajaarnini pissutigalugu aggustimi tunuarpoq.

Taanna ilaqutariinnut, inatsiseqarnermullu naalakkersuisunngortinneqarnermi kingorna qaammatialuit qaangiutiinnartut sulinngiffeqalerpoq.

Inatsiseqarnermut naalakkersuisuuffik Naaja Nathanielsenimut (IA) aamma ineqarnermut, attaveqaasersuutinut, aatsitassanut naligiissitaanermullu naalakkersuisooreersumut tunniunneqarpoq.

AAMMA ATUARUK Eqaluk Høegh naalakkersuisutut tunuarpoq

Ilaqutariinnut naalakkersuisoqarfik Paneeraq Olsenimit (Naleraq) tiguneqarpoq.

Peqqinnissamut naalakkersuisuuffik Pele Brobergimit (Naleraq) inuussutissanut niuernermullu naalakkersuisumit tiguneqassaaq. Taannalu pisinnaanngikkaangat suliat Isumaginninnermut, Suliffeqarnermut Nunamullu Namminermut Naalakkersuisumit Mimi Karlsenimiit ingerlanneqartassapput.

Tusagassiortunut katersortitsineq nalunaaqutaq ataatsimut

Naalakkersuisut tusagassiortunik katersortitsinissamut ullumi nalunaaqutaq ataatsimut aggersaapput. Coronavirusimik misissuinermi periusip naleqqussarnera saqqummiunneqassalluni.

Inuussutissarsiornermut, Niuernermullu Naalakkersuisoq, Pele Broberg Isumaginninnermut, Suliffeqarnermut Nunamullu Namminermut Naalakkersuisoq Mimi Karlsen aamma Nakorsaaneq Henrik L. Hansen katersortitsinermi peqataassallutik.