QINERSINEQ: Naalakkersuisunut ilaasortat angalanissaraluatik taamaatiinnaraat
Naalakkersuisut atuunnissaannut kaajallaasitaq marlunngormat atuutilerpoq tamatumalu Naalakkersuisut Inatsisartunut qinersinissap tungaanut sulinerata sinaakkutaannik annikillisitsivoq.
Kaajallaasitaq politikerit arlaqartut angalanissamut qangali pilersaarutaareersunik taamaatitsiinnartariaqarnerannik kinguneqarpoq.
Assersuutigalugu aatsitassanut naalakkersuisup, Múte B. Egedep Canadami Torontomiinnissaa sivikillivoq. Pilersaarut malillugu taanna aningaasaliisinnaasunut ataatsimeersuarnermi nunatta aatsitassarsiorfiusinnaaneranik nittarsaassinissamut peqataasussaagaluarpoq.
AAMMA ATUARUK Atassut vil ikke i regering
Múte B. Egedeli nunatsinnut angerlarniarluni ataasinngormat unnukkut aalajangertoq, Sermitsiaq.AG allappoq.
Aammattaaq aalisarnermut piniarnermullu naalakkersuisup, Karl Kristian Krusep Bergenimi Norgemiittumi sisamanngorpat tungaanut North Atlantic Seafood Forumip aaqqissuussaani aalisarneq pillugu isumasioqatigiinnermi peqataanissaraluarani taamaatiinnarpaa.
Kruselli ullorsiutaaniittut tamarmik ataasinngormalli taamaatinneqartut, naalakkersuisoqarfiup pisortaa, Jørgen Isak Olsen paasissutissiivoq.
Doris Københavnimi ataatsimeeqateqartoq
Kiisalu ilinniartitaanermut, kultureqarnermut, ilisimatusarnermut ilageeqarnermullu naalakkersuisoq, Doris Jakobsen Jensen sapaatip akunnerani matumani Københavnimi arlariinnik ataatsimeeqateqarpoq, ilaatigut Japanimiut Danmarkimi aallartitaat ataatsimeeqatigalugu. Tamannali qinersinissap nalunaarutigineqannginnerani pisoq, Doris Jakobsen Jensenip allattaa KNR-imut paasissutissiivoq.
AAMMA ATUARUK Aalisarnermut inatsit mittarfiillu kinguartinneqartussanngortut
Taassuma Danmarkimi Efterskolit Kattuffiata siulittaasua, Troels Borring marlunngormat aamma ataatsimeeqatigaa.
Ataatsimiinneralli Naalakkersuisut marlunngornermi ataatsimiinnermi politikkikkut qaffasissumik ataatsimiinnissat tamarmik taamaatinneqarnissaasa aalajangerneqannginnerani pisoq, Doris Jakobsen Jensenip allattaa, Rosa Thorsen KNR-imut paasissutissiivoq.
Ulloq suna qinersisoqassanersoq Inatsisartut marlunngorpat aalajangissavaat.
