Naalakkersuisuni nikititerisoqartoq

Karl Kristian Kruse aalisarnermut piniarnermullu naalakkersuisunngortinneqarpoq Vittus Qujaukitsullu akisussaaffigisaasa ilaat Enoksenimut isumagisassanngortinneqarlutik.

Allattoq Kenneth Elkjær

apriilip 24-at 2017 11:23

Naalakkersuisuni ataasinngornermi nikititerisoqarpoq. Vittus Qujaukitsoq naalakkersuisutut tunuarpoq. Suka K. Frederiksen nunanut allanut naalakkersuisunngorpoq, Hans Enoksenilu inuussutissarsiornermut, suliffeqarnermut nukissiuuteqarnermullu naalakkersuisunngorpoq.

Karl Kristian Kruse taamaalilluni aalisarnermut piniarnermullu naalakkersuisunngoqqippoq. Naalakkersuisuuffik taanna siorna maajip qaammataani qimappaa. Ilaquttami piffissaqarfiginerunissaanik tunngavilersuuteqarluni naalakkersuisutut tunuarnerminit ukioq ataaseq qaangiutinngitsorluunniit taamaalilluni naalakkersuisunngoqqippoq.

Aalisarnermut piniarnermullu naalakkersuisuunissani taamaalilluni piffissaqarfiginerulersimavaa. Siorna maajip qaammataani tunuarnera pillugu allaaserisaq ataani atuarneqarsinnavoq:

Aamma atuaruk Krusep siunissami sussanerluni oqaatigisinnaanngilaa

Nikititerisoqareernerani Naalakkersuisut ukuninnga inuttaqalerput:

Sara Olsvig, Inuit Ataqatigiit, Isumaginninnermut, Ilaqutariinnut, Naligiissitaanermut
Inatsisinillu atuutsitsinermut Naalakkersuisunngussaaq.

Hans Enoksen, Partii Naleraq, Inuussutissarsiornermut, Suliffeqarnermut,
Niuernermut Nukissiuuteqarnermullu Naalakkersuisunngussaaq.

Aqqaluaq B. Egede, Inuit Ataqatigiit, Aningaasaqarnermut Akileraartarnermullu
Naalakkersuisunngussaaq.

Agathe Fontain, Inuit Ataqatigiit, Peqqissutsimut Nunat Avannarliit
Suleqatigiinneranullu Naalakkersuisunngussaaq.

Doris Jakobsen, Siumut, Ilinniartitaanermut, Kultureqarnermut, Ilisimatusarnermut
Ilageeqarnermut Naalakkersuisunngussaaq.

Suka K. Frederiksen, Siumut, Namminiilivinnermut, Nunanut allanut
Nunalerinermullu Naalakkersuisunngussaaq.

Múte B. Egede, Inuit Ataqatigiit Aatsitassanut ikummatissanullu
Naalakkersuisunngussaaq.

Erik Jensen, Siumut, Kommuninut, Nunaqarfinnut, Isorliunerusunut,
Attaveqaqatigiinnermut Ineqarnermullu Naalakkersuisunngussaaq.

Karl-Kristian Kruse, Siumut Aalisarnermut Piniarnermullu Naalakkersuisunngussaaq.

KNR-imit ullaaq manna oqaatigineqaraluarpoq Hans Enoksen naalakkersuisooqatiginnit tunuartoq. Tamannali paatsoornermik pissuteqarpoq.