Ilaqutaasut angalasarnissaat: Naalakkersuisoqatigiit isumaat allanngortoq
Politikerit ilaqutaasa akiliunneqarlutik Nuummut ukiut tamaasa angalasarnerisa ataatsimik ilaneqarnissaanik Inatsisartut Siulittaasoqarfiata siunnersuutaa isornartorsiorneqarsimaqisoq tunuartinneqartoq Naalakkersuisoqatigiit nalunaaruteqarput.
Tamannalu Ineqi Kielsenimit Inatsisartut siulittaasoqarfiani ilaasortaasumit KNR-imut uppernarsarneqarpoq.
- Inatsisartuni ilaasortat ilaqutariinnikkut inuunerisa eqqarsaatigineqarnerunissaanik, minnerunngitsumillu ilaasortat qitornaat eqqarsaatigalugit, kissaateqarneq aallaavigalugu siunnersuut saqqummiunneqarpoq, siulittaasoqarfik siornatigut taama tunngavilersuuteqarpoq.
Maannali tassa siunnersuut tunuartinneqarpoq.
- Naalakkersuisoqatigiit kissaataat naapertorlugu Inatsisartut siulittaasoqarfianit siunnersuut saqqummiupparput. Naalakkersuisoqatigiilli isumaat maanna allanngorpoq, Lars-Emil Johansen oqarpoq.