Naalakkersuisoqarfimmi pisortat atorfimminnit soraartut pingasunngorput

Naalakkersuisut pisortanik nutaanik sulisussarsiortariaqassapput. Qullersatummi pisortaasut tulleriiaaginnarlutik soraartiterput.

Steffen-Ulrich Lynge, Ineqarnermut, Ataaveqaatinut Angallannermullu naalakkersuisoqarfimmi pisortaasoq siulliulluni soraarpoq, naalakkersuisunngortut ataanni sulinissani takorlooruminaatsikkamiuk.

Soraartut tulleraat Aningaasaqarnermut aamma Nunami namminermi pissutsinut naalakkersuisoqarfimmi pisortaq, Jan H. Lynge-Pedersen.

Maannalu Lise Lennert Olsen, Ilaqutariinnermut Inatsisinullu naalakkersuisoqarfimmi pisortatut atorfimminit soraarpoq.

Taanna radioaviisimut oqaluttuarpoq suliffimminik naammagisaqannginnini pissutigalugu soraarani, nutaamilli misileerusukkami soraarluni. Atorfimmi inuttassarsiuunneqarnissaa iluatsiinnarlugu soraarpoq.

- Namminersorlutik Oqartussat ukiorpassuarni suliffigaakka, taamaammat maanna suliunnaarnera pissusissamisoortutut isigaara.

Lise Lennert Olsen atorfimminit soraarnermi kingorna sussanerluni nalugallarpaa, siullertulli sivisuumik feeriaqqaarniarluni oqaatigalugu.

Atorfik maanna inuttassarsiuunneqarpoq, juulip aallaqqaataanilu inuttalerneqarnissaa kissaatigineqarluni.