Naalakkersuisoqarfik: Qaasuitsup kommunia nammineq pisuuvoq
Tassami kommunip akissarsisitsinermut uppernarsaatinik suli nassiussinngilaq, naalakkersuisoqarfimmi pisortaq Martha Lund Olsen oqarpoq.
Pingasunngormat Radioaviisimi oqaluttuaraarput, Qaasuitsup Kommunia koruuninik milionilikkaanik tigoriaannarnik amikkisaartoq, kommunip innarluutilinnik sullissinerminit aningaasanik Namminersornrullutik Oqartussanit utertoorutissani utaqqimmagit.
Qaasuitsup Kommuniani isumaginninnermut pisortaq Magga Fencker maanna oqaluttuarpoq, kommuni ilaatigut innarluutilinnut najugaqarfiutaani sulisunik akissarsitsisarneranit utertoorutissaminik ukiortaamiilli suli tigosaqanngitsoq,
Magga Fencker oqaluttuarpoq, kommunit kattussuunnerisa kingorna periutsinik assigiissaarineq suli naammassinngitsoq, aammalu innarluutilinnik sullisinermi aningaaartuutit angissusaat suli paasinarsingitsut.
Kisianni Ilaquarinnermut Peqqissutsimullu Naalakkersuisoqarfiup akisussaaffik kommunimut utertippaa. Tassami Kommuni akissarsisitsisarnermut uppernarsaatinik suli nassiussinngilaq, naalakkersuisoqarfimmi pisortaq Martha Lund Olsen oqarpoq.
- Ajornartorsiutaasimasoq paasivara, Qaasuitsup Kommuniani annertuumik innarluutilinnik ikiorsiinermi qinnuteqatit aallaaviagalugit ikiorsiissutaasinnaasut utertinnissaannut Qaasuitsup Kommunia takussutissanik amigaateqartarsimasoq, taannalu peqqutaasoq Namminersornerullutik Oqartussaniit suli utwertitsinnginnitsinnut, Martha Lund Olsen oqarpoq.
Borgmester Jess Svane-ip pingasunngormat aamma eqqaava, tigoraannarnik aningaasakilliornerminnut akileraarutit peqqutaasunut ilasut.
Kisianni tamanna Akileraartarnermut Aqutsisoqarfimmiit illua tungilerneqarpoq.
- Borgmester Jess Svane kukkusumik paasitinneqarsimavoq. Illuanik, akileraartarnerup ataatsimuulersinnerata malitsigisaanik, kommunit akileraarutinit isertitanit tigusassatik siornatigornit ullunik marlunnik sukkanerusumik tigusalerpaat, aqutsisoqarfimmi pisortaq, Claus Steenskov Jensen, oqarpoq.
